ცენტრალური საარჩევნო კომისია ამტკიცებს, რომ ბიულეტენისთვის განკუთვნილი ქაღალდი იყო უფრო სქელი, ვიდრე ვენდორი კომპანია სმარტმატიკის მიერ რეკომენდირებული ზომა.
ამის შესახებ ცესკომ განცხადება გამოაქვეყნა "მაღალი საზოგადოებრივი ინტერესიდან გამომდინარე".
პირველ რიგში, გვინდა აღვნიშნოთ, რომ კანონმდებლობის შესაბამისად არამარტო ელექტრონული, არამედ ყველა არჩევნების ბიულეტენებისთვის ქაღალდს საარჩევნო ადმინისტრაცია ხელშეკრულების საფუძველზე ყიდულობს და აწვდის კონტრაქტორ სტამბებს. ამდენად აშკარაა, ტექნიკურ-ლოგისტიკური საკითხიც კი მანიპულაციურად არის წარმოჩენილი და საარჩევნო პროცესის დაზიანებას ისახავს მიზნად.
რაც შეეხება უშუალოდ 26 ოქტომბრის არჩევნებისთვის დამზადებულ ბიულეტენებს - საარჩევნო ადმინისტრაციას კომპანია „სმარტმატიკისგან“ ჰქონდა რეკომენდაცია საარჩევნო ელექტრონული აპარატებისთვის განკუთვნილი ბიულეტენებისთვის შეეძინა ოფსეტური, 162 გრამიანი (+-20%) ქაღალდი.
აღნიშნული რეკომენდაციის გათვალისწინებით, საარჩევნო ადმინისტრაციამ შესაბამისი ხელშეკრულების საფუძველზე შეიძინა 190 გრამიანი ოფსეტური ქაღალდი, რომელიც უფრო სქელია, ვიდრე რეკომენდებული იყო ვენდორი კომპანიის მიერ." - წერს ცესკო.
მათივე ინფორმაციით, 26 ოქტომბერს გამოყენებული ბიულეტენების ქაღალდის სისქე მეტი იყო, ვიდრე 2021 წლის არჩევნებზე კრწანისის ოლქში გამოყენებულ ბიულეტენების ქაღალდის სისქე.
"ბიულეტენები დაიბეჭდა შესაბამისი წესით შერჩეულ სამ სტამბაში და ამ პროცესს აკვირდებოდნენ ცესკოს წევრები, ასევე ადგილობრივი და საერთაშორისო დამკვირვებლები. ბეჭდვასთან დაკავშირებით ინფორმაცია იყო საჯარო." - წერია განცხადებაში.
