რუსეთმა ხარკოვზე რაკეტებით იერიში მიიტანა. თავდასხმის შედეგად, ბოლო მონაცემებით, 44 ადამიანია დაშავებული, მათ შორის, 7 მცირეწლოვანი.
როგორც ხარკოვის ოლქის გუბერნატორი, ოლეგ სინეგუბოვი Telegram-ზე წერს, ოკუპანტებმა ქალაქის ნემიშლიანსკისა და სალტივისკის რაიონებზე Iskander-ის ტიპის ბალისტიკური რაკეტებითაც მიიტანეს იერიში. დაზიანებულია სამოქალაქო ინფრასტრუქტურა, მათ შორის, ხარკოვის სპორტის სასახლე, სავაჭრო ცენტრი და ჰიდროპარკი.
სპორტის სასახლეში სამძებრო-სამაშველო სამუშაოები გრძელდება. გუბერნატორის ცნობით, კომპლექსის ერთ-ერთი თანამშრომელი ნანგრევებიდან ცოცხალი ამოიყვანეს, თუმცა რამდენიმე, შესაძლოა, ისევ ნანგრევების ქვეშ იმყოფებოდეს.
მომხდარს უკრაინის პრეზიდენტი, ვოლოდიმირ ზელენსკი გამოეხმაურა.
"რუსეთი ხარკოვს ისევ ატერორებს. არტყამს სამოქალაქო ინფრასტრუქტურას ქალაქის შიგნით. [...]
მსოფლიოს ყველა საჭირო ძალა ჩართული უნდა იყოს ამ პროცესში, რომ ტერორი შეწყდეს. ეს მოითხოვს არა ექსტრაორდინარულ ძალებს, არამედ ლიდერების საკმარის გამბედაობას - გამბედაობას, რომ უკრაინას გადასცენ ყველაფერი, რაც მას თავის დასაცავად სჭირდება" - წერს უკრაინის პრეზიდენტი Telegram-ზე.
ცნობისთვის, ოკუპანტებმა ხარკოვზე იერიში 2 დღის წინ, 30 აგვისტოსაც მიიტანეს. თავდასხმას 7 ადამიანის სიცოცხლე ემსხვერპლა, მათ შორის, 14 წლის გოგო. დაშავდა 97 ადამიანი, რომელთაგან 22 არასრულწლოვანია.
- რუსებმა ხარკოვი დაბომბეს, დაიღუპა 5, დაშავდა 47 ადამიანი
-
ხარკოვზე მიტანილი იერიშის შედეგად დაღუპულთა რიცხვი 7-მდე გაიზარდა, დაშავებულთა კი 97-მდე
ხარკოვის ოლქის დასახლებებზე ოკუპანტების თავდასხმები მას შემდეგ გახშირდა, რაც რუსეთის შეიარაღებულმა ძალებმა მაისში ოლქზე ახალი ტრანსსასაზღვრო შეტევა წამოიწყეს.
