საფრანგეთის პრეზიდენტის, ემანუელ მაკრონის თქმით, მისი ქვეყნის დაზვერვის სამსახურის მონაცემები ადასტურებს, რომ მოსკოვში მომხდარი ტერაქტის უკან ე.წ. ისლამური სახელმწიფო (ISIS), კერძოდ ე.წ. ხორასნის ვილაიეთი იდგა. მაკრონის თქმით, ტერორისტული ორგანიზაციის ამ დანაყოფმა ტერაქტების მოწყობა უკანასკნელ თვეებში საფრანგეთშიც სცადეს.
ემანუელ მაკრონს ჟურნალისტებთან საუბრის დროს მეტი დეტალი არ გაუმხელია, თუმცა, დღეს საფრანგეთში ქვეყნის მასშტაბით ტერორიზმის საფრთხის უმაღლესი დონე გამოცხადდა.
ქვეყნის პრემიერმინისტრის, გაბრიელ ატალას მიხედვით, უსაფრთხოების უმკაცრესი ზომების მიღების მიზეზი მოსკოვში მომხდარ ტერაქტზე ისლამური სახელმწიფოს მიერ პასუხისმგებლობის აღება გახდა, რაც, შესაძლოა, საფრანგეთისთვისაც სერიოზულ საფრთხეს წარმოადგენდეს.
საფრანგეთში ტერორიზმის საფრთხის სამი დონე არსებობს. მთავრობის გადაწყვეტილებით, ქვეყანაში მესამე, უმაღლესი დონე ამოქმედდა, რაც საშუალებას იძლევა, გაძლიერდეს შეიარაღებული პირების მიერ ქვეყნის მასშტაბით პატრულირება ისეთ საჯარო ადგილებში, როგორიცაა მატარებლის სადგურები, აეროპორტები, რელიგიური დაწესებულებები და ა.შ.
22 მარტის ღამეს რუსეთის დედაქალაქის მახლობლად, მოსკოვის ოლქში, კრასნოგორსკში მდებარე "კროკუს სითი ჰოლის" საკონცერტო დარბაზში, სულ მცირე, სამი შეიარაღებული პირი შეიჭრა. მათ შენობაში მყოფ მოქალაქეებს ცეცხლსასროლი იარაღიდან გაუხსნეს ცეცხლი. რუსულ ტელეგრამ-არხებზე გავრცელდა კადრები, რომლებშიც ჩანს, როგორ ისვრიან საკონცერტო დარბაზში თავდამსხმელები და როგორ იმალება ხალხი. გავრცელებულ ვიდეოებში ჩანან დაღუპული ადამიანებიც.
თავდამსხმელებმა შემთხვევის ადგილიდან მიმალვა შეძლეს, Renault-ის მარკის თეთრი ავტომობილით. ხანძრის შედეგად განადგურდა საკონცერტო დარბაზის ზედა სართულები. რუსეთის საგამოძიებო კომიტეტის ბოლო მონაცემებით, დაღუპულთა რიცხვი 137-ია. ტერაქტში მონაწილე პირები 23 მარტს დააკავეს. რუსულ ტელეგრამ-არხებზე გავრცელდა ვიდეო, რომელშიც ჩანს, რომ ერთ-ერთ ეჭვმიტანილს სპეცსამსახურების თანამშრომელი მოჭრილ ყურს პირში ტენიდა. 24 მარტს კი გავრცელდა ფოტო, რომელშიც კიდევ ერთ თავდამსხმელს აწამებდნენ. ფოტოში ჩანს ფარიდდუნ შამსუთდინი, რომელიც ძირს, შარვალჩახდილი გდია. მას ერთ-ერთ ფეხზე ადგას რუსი ძალოვანი. ფოტოში ჩანს ელექტრომოწყობილობაც, რომლის სადენებიც, სავარაუდოდ, კროკუს სითი ჰოლზე თავდამსხმელის სასქესო ორგანოზეა შეერთებული.
რუსეთის პრეზიდენტი, ვლადიმირ პუტინი მომხდარს პირადად მხოლოდ რამდენიმე საათის შემდეგ გამოეხმაურა. მისი მტკიცებით, გაქცეული ტერორისტები, რომლებიც დააკავეს, უკრაინის საზღვრის მიმართულებით მიდიოდნენ და მეზობელ ქვეყანაში გადასვლას აპირებდნენ. ამას უარყოფს უკრაინა.
თავდასხმაზე პასუხისმგებლობა ე.წ. ისლამურმა სახელმწიფომ (ISIS), კერძოდ ე.წ. ხორასნის ვილაიეთმა აიღო. ტერორისტულ ორგანიზაციასთან დაკავშირებულმა მედიამ გამოაქვეყნა განცხადება, რომელშიც თავდასხმას "ბოლო წლებში ყველაზე დაუნდობელი" უწოდეს და ხაზი გაუსვეს, რომ მათ სამიზნეს ქრისტიანები წარმოადგენდნენ.
7 მარტს აშშ-ს საელჩო რუსეთში საკუთარ მოქალაქეებს პოტენციური თავდასხმის შესახებ აფრთხილებდა. საკუთარ მოქალაქეებს ასევე აფრთხილებდნენ სხვა დასავლური საელჩოებიც.
