26 ივლისს, თბილისში, Cavea გალერეაში კინოსტუდია Disney-ის ახალი ფილმის, დაწყევლილი სახლის პრემიერა გაიმართა. სურათი ქართულ კინოგაქირავებაში მსოფლიო პრემიერაზე ერთი დღით ადრე გამოვიდა.
კომედიური ჰორორის მოქმედება ნიუ-ორლეანში ვითარდება. მთავარი გმირი მცირეწლოვან შვილთან ერთად მოჩვენებებით დასახლებულ სახლში გადადის. დედა-შვილს სახლიდან ბოროტი ძალების განდევნაში ადგილობრივი მღვდელი, მეცნიერი, ექსტრასენსი და ისტორიკოსი ეხმარებიან.
სურათში ჰოლივუდის მთელი თანავარსკვლავედი მონაწილეობს: როზარიო დოუსონი, ოუენ უილსონი, დენი დე ვიტო, ჯარედ ლეტო, ჯემი ლი კერტისი, ვაინონა რაიდერი. ფილმი სანდენსის კინოფესტივალის გამარჯვებულმა რეჟისორმა, ჯასტინ სიმენმა გადაიღო.
