ილონ მასკის კომპანია SpaceX-ი მსოფლიოში ყველაზე მძლავრ რაკეტას გამოცდის. Starship-ის აფრენის საწყისი წერტილი ტეხასის შტატია. SpaceX-ში იმედოვნებენ, რომ რაკეტა მთვარემდე მიაღწევს, ხოლო სამომავლოდ საბოლოო დანიშნულების ადგილი მარსი იქნება.
SpaceX-ის დამფუძნებლის, ილონ მასკის ვარაუდით, პირველი მცდელობა წარმატებით არ დასრულდება.
"წარმატების მოლოდინი არ უნდა გვქონდეს. სავარაუდოდ ხვალინდელი დღე წარმატებით არ დასრულდება. ეს უბრალოდ ფუნდამენტურად რთულია". - აღნიშნა მასკმა მისიასთან დაკავშირებით. მისი თქმით, ამ წუთისთვის გუნდი მონაცემების შეგროვებაზე მუშაობს, როგორ აფრინდება ხომალდი და დაბრუნდება დედამიწაზე. NASA-სგან განსხვავებით, SpaceX-ი საცდელი ფრენებისას ნაკლები სიფრთხილით გამოირჩევა, რადგან როგორც მასკი ამბობს, შეცდომის შემთხვევაში იგებ, რა იყო მარცხის მიზეზი.
Starship-ის პროტოტიპმა ხომალდებმა ბოლო წლების განმავლობაში რამდენჯერმე გაიარეს სატესტო ფრენა, თუმცა ახალი რაკეტა მათზე გაცილებით დიდი სიმძიმისაა და ეს მისი პირველი გამოცდა იქნება.
Starship-ის პროექტი SpaceX-მა 2019 წელს წარადგინა. Starship-ი გათვლილია ადამიანების გადაყვანასა და ტვირთის გადატანაზე დედამიწის ორბიტაზე, მთვარესა და მარსზე. მასკის გათვლებით ეს ხომალდი მარსზე 2026 წელს გაემგზავრება.