ამერიკელმა ჟურნალისტმა, Wall Street Journal-ის რეპორტიორმა, ევან გერშკოვიჩმა, რომელიც რუსეთში ჯაშუშობის ბრალდებით არის დაპატიმრებული, მშობლებს აშშ-ში 5 აპრილს წერილი მისწერა და თქვა, რომ ის იმედს არ კარგავს.
"მინდა ვთქვა, რომ იმედს არ ვკარგავ, ვკითხულობ, ვვარჯიშობ და ვცდილობ ვწერო." - წერს Wall Street Journal-ის რეპორტიორი.
წერილში, რომელიც მშობლიურ, რუსულ ენაზეა დაწერილი, რეპორტიორი ციხის ცხოვრებასა და კვების რაციონზეც წერს.
"დედა, შენ, სამწუხაროდ თუ საბედნიეროდ, ციხის კვებისთვის მომამზადე. შვრიასა და ბურღულეულს მაჭმევენ. ეს ბავშვობას მახსენებს" - წერს გერშკოვიჩი.
რეპორტიორის მშობლებმა, ელა მილმანმა და მიხაილ გერშკოვიჩმა გასულ კვირას თქვეს, რომ ისინი ოპტიმისტურად არიან განწყობილნი და პოზიტიური შედეგის იმედი აქვთ.
"ეს არის ერთ-ერთი ამერიკული თვისება, რომელიც ჩვენ ავითვისეთ - იყავით ოპტიმისტური, გჯეროდეთ ბედნიერი დასასრულის, მაგრამ მე სულელი არ ვარ. მე მესმის, რაშიცაა საქმე" - თქვა მილმანმა.
გერშკოვიჩს ბრალის დამტკიცების შემთხვევაში 20 წლით თავისუფლების აღკვეთა ემუქრება.
The Wall Street Journal-ის რეპორტიორი ჯაშუშობის ბრალდებით 30 მარტს დააკავეს.
7 აპრილს სენატის რესპუბლიკელმა და დემოკრატმა ლიდერებმა, მიჩ მაკკონელმა და ჩაკ შუმერმა გერშკოვიჩის დაკავება მკაცრად დაგმეს.
"ჟურნალისტიკა არ არის დანაშაული. მოვითხოვთ, ბატონ გერშკოვიჩის წინააღმდეგ უსაფუძვლო, შეთითხნილი ბრალდებების მოხსნას და დაუყოვნებლივ გათავისუფლებას". - ნათქვამია მათ განცხადებაში.
რუსეთის FSB-ის უშიშროების სამსახურის ინფორმაციით, მათ "უკანონო საქმიანობა" შეაჩერეს. ჟურნალისტი დააკავეს, როცა "ამერიკული ინსტრუქციებით მოქმედებდა".
აშშ-ის პრეზიდენტმა, ჯო ბაიდენმა რუსეთის მიერ ჯაშუშობის ბრალდებით The Wall Street Journal-ის რეპორტიორის ევან გერშკოვიჩის დაკავებას სრულიად უკანონო უწოდა.
"ჩვენ ცალსახად ვამბობთ, რომ სრულიად უკანონოა ის, რაც ხდება. ამის პირდაპირ გამოცხადება ცვლის დინამიკას". - თქვა ბაიდენმა.
"შეერთებულ შტატებს აქვს სრული უფლება, დაიცვას თავისი მოქალაქეები, მაგრამ სასჯელის შესახებ საბოლოო გადაწყვეტილებას რუსეთის სასამართლო მიიღებს [...] მე არ მესმის, რა ცვლილებები მოაქვს და რას ნიშნავს ეს ნაბიჯი [აშშ-ის დეპარტამენტის კომენტარი]. ნებისმიერ შემთხვევაში, აშშ-ს ყოველთვის შეეძლო თავისი მოქალაქეების უფლებების დაცვა" - თქვა კრემლის პრესსპიკერმა დმიტრი პესკოვმა.
კრემლის პრესსპიკერის თქმით, გერშკოვიჩი დაიჭირეს, რადგან მან დაარღვია შესაბამისი რუსული კანონი, თუმცა საბოლოო განაჩენს ამის შესახებ რუსული სასამართლო გამოიტანს.