ე.წ. ქურდული სამყარო

ლეკვი, ხონსკი, მოლა, ხავთასა – შსს-ს ე.წ. ქურდულ სამყაროსთან კავშირში მყოფი 4 პირი დააკავა

shutterstock

შინაგან საქმეთა სამინისტროს ინფორმაციით, გენერალურ პროკურატურასთან ერთად ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, ე.წ. ქურდულ სამყაროსთან კავშირში მყოფი, წარსულში სხვადასხვა მძიმე დანაშაულისთვის ნასამართლევი 4 ადამიანი დააკავეს, ხოლო 1-ს ბრალი დაუსწრებლად წარუდგინეს. 

უწყების ცნობით, ქურდული სამყაროს საქმიანობის მხარდაჭერის გამო დაკავებული არიან: 1977 წელს დაბადებული ი.ხ. (მეტსახელად ხავთასა), 1983 წელს დაბადებული ზ.გ. (მეტსახელად ლეკვი) და 1976 წელს დაბადებული ლ.ა. (მეტსახელად მოლა). 1978 წელს დაბადებული მ.ჩ. (მეტსახელად ხონსკი) კი "კანონიერი ქურდისთვის" მიმართვის ბრალდებით არის დაკავებული. რაც შეეხება 1977 წელს დაბადებულ ჯ.კ.-ს, შსს-ს განცხადებით, ვინაიდან იგი საზღვარგარეთ იმყოფება, მას ე.წ. კანონიერი ქურდობის ფაქტზე ბრალი დაუსწრებლად წარედგინა. 

"გამოძიებამ დაადგინა, რომ ი.ხ.-ს, ზ.გ.-ს და ლ.ა.-ს, ფინანსური დავის ნიადაგზე, დაპირისპირება მოუხდათ მ.ჩ.-სთან, რის გამოც აღნიშნული დავის მოგვარება ე.წ. ქურდული გარჩევის გზით სცადეს და მას ფიზიკურად გაუსწორდნენ. თავის მხრივ, მ.ჩ.-მ მომხდარ კონფლიქტთან დაკავშირებით საქმის კურსში ჩააყენა საზღვარგარეთ მყოფი ქართველი "კანონიერი ქურდი" ჯ.კ. (მეტსახელად "ჯეირანა"), რომელმაც მოდავე მხარეებს ე.წ. ქურდული გარჩევის მოწყობა მოსთხოვა. 

თბილისში, ლ.ა.-ს საცხოვრებელ ბინაში მოეწყო ე.წ. ქურდული გარჩევა, რომელშიც მოდავე მხარეები მონაწილეობდნენ, ხოლო "კანონიერი ქურდი" ჯ.კ. შეხვედრაში დისტანციურად ჩაერთო. 

პოლიციამ, ჩატარებული ჩხრეკის შედეგად, ნივთმტკიცებად ამოიღო კომპიუტერული ტექნიკა და ბრალდებულების მობილური ტელეფონები, რომელთა საშუალებითაც ისინი ერთმანეთს და საზღვარგარეთ მყოფ ქართველ "კანონიერი ქურდს" უკავშირდებოდნენ". - ვკითხულობთ განცხადენაში. 

უწყების ცნობით, ე.წ. კანონიერი ქურდობის ე.წ. კანონიერი ქურდისთვის მიმართვის და ე.წ. ქურდული სამყაროს საქმიანობის მხარდაჭერის ფაქტებზე გამოძიება საქართველოს სისხლის სამართლის კოდექსის 223-ე პირველი პრიმა მუხლის მე-2 ნაწილით, 223-ე მე-3 პრიმა მუხლის მე-2 ნაწილით და 223-ე მე-4 პრიმა მუხლის 1-ლი ნაწილით მიმდინარეობს. დანაშაულები 6-დან 15 წლამდე ვადით თავისუფლების აღკვეთას ითვალისწინებს.

კომენტარები