მიხეილ სააკაშვილის ჯანმრთელობა

ჩალაძე: ამ წუთებში მიხეილ სააკაშვილი რეანიმაციაში გადაჰყავთ

UPDATE: კლინიკა ვივამედის დირექტორი, ნინო ნადირაძე ამბობს, რომ ექსპრეზიდენტი, მიხეილ სააკაშვილი რეანიმაციულ განყოფილებაში არ გადაუყვანიათ. 


ერთიანი ნაციონალური მოძრაობის წევრის, გიორგი ჩალაძის თქმით, ექსპრეზიდენტი მიხეილ სააკაშვილი რეანიმაციაში გადაჰყავთ. 

ამ წუთებში მიხეილ სააკაშვილი რეანიმაციაში გადაჰყავთ. მის პირად ექიმთან საუბრის შემდეგ, ამ წუთას გამოვედი. ბატონი ზურაბ ჩხაიძეც საქმის კურსშია. სააკაშვილის ჯანმრთელობის მდგომარეობა საგანგაშოა და ის კრიტიკულ ზღვარზეა. მისი სიცოცხლის შესანარჩუნებელი ღონისძიებების გასატარებლად, საჭიროა, რომ სააკაშვილი რეანიმაციულ განყოფილებაში იმყოფებოდეს და ამ წუთებში, ვიდრე ჩვენ ვსაუბრობთ, რეანიმაციული პალატა მზადდება, რომ სააკაშვილს სიცოცხლე შეუნარჩუნონ. ის კლინიკიდან არ გაჰყავთ, ამ შენობაშივე იქნება რეანიმაციულ განყოფილებაში.". - თქვა ჩალაძემ კლინიკა ვივამედთან ჟურნალისტებთან საუბარში.

დღეს განცხადება გააკეთა ვივამედის კლინიკურმა დირექტორმა, ზურაბ ჩხაიძემაც. მან თქვა, რომ დღეის მდგომარეობით, მიხეილ სააკაშვილი სტაბილურ პარამეტრებს ინარჩუნებს. მისი განცხადებით, ექსპრეზიდენტის ჰემოდინამიკური და რესპირატორული მაჩვენებლები სტაბილურია.

ჩხაიძემ ასევე თქვა, რომ კორონავირუსზე მიხეილ სააკაშვილის PCR ტესტის პასუხი უკვე უარყოფითია. ვივამედის კლინიკური დირექტორი აცხადებს, რომ გუშინ გადამოწმდა სააკაშვილის სხვადასხვა ლაბორატიული ანალიზები და მისივე თქმით, ლაბორატორიული მონაცემების კუთხით, არის გაუმჯობესება.

კომენტარები