საქართველოში ევროკავშირის ახალმა ელჩმა, პაველ ჰერჩინსკიმ პრეზიდენტ სალომე ზურაბიშვილის რწმუნებათა სიგელები გადასცა.
პრეზიდენტის ადმინისტრაციის ცნობით, ორბელიანების სასახლეში რწმუნებათა სიგელების გადაცემის ოფიციალური ცერემონიის შემდეგ პრეზიდენტმა ელჩთან პირისპირ შეხვედრა გამართა. საუბარი შეეხო საქართველოს ევროკავშირში ინტეგრაციის პროცესს.
ჰერჩინსკი ბრიუსელში ევროკავშირის საგარეო ქმედებათა სამსახურის ერთიანი უსაფრთხოებისა და თავდაცვის პოლიტიკის და კრიზისებზე რეაგირების დირექტორატს ხელმძღვანელობდა. მანამდე მას ბრიუსელში პოლიტიკისა და უსაფრთხოების კომიტეტში პოლონეთის ელჩის, ნიუ-იორკში გაეროში პოლონეთის მუდმივი წარმომადგენლის მოადგილის და პოლონეთის საგარეო საქმეთა სამინისტროში ევროკავშირის დეპარტამენტის დირექტორის მოადგილის თანამდებობები ეკავა.
ჰერჩინსკიმ საქართველოში ევროკავშირის წარმომადგენლობის ხელმძღვანელის თანამდებობაზე კარლ ჰარცელი ჩაანაცვლა, რომელსაც უფლებამოსილების ვადა ამოეწურა.
