რუსეთ-უკრაინის 2022 წლის ომი

დიდი ბრიტანეთი მოკავშირეებთან ერთად მოლდოვაში თანამედროვე შეიარაღების გაგზავნას გეგმავს

ლიზ თრასი

დიდი ბრიტანეთის საგარეო საქმეთა მინისტრმა, ლიზ თრასმა თქვა, რომ გაერთიანებული სამეფო და საერთაშორისო მოკავშირეები მოლდოვაში თანამედროვე შეიარაღების გაგზავნაზე მსჯელობენ.

თრასის თქმით, ქვეყანა, რომელიც უკრაინის სამხრეთ-დასავლეთით მდებარეობს, NATO-ს სტანდარტებით უნდა იყოს აღჭურვილი. ვინაიდან, მართალია მოლდოვა ამჟამად სამხედრო ბლოკის წევრი არ არის, თუმცა უკრაინის ომის შემდეგ ვლადიმირ პუტინის რეჟიმის მორიგი შესაძლო სამიზნეა.

"პუტინმა ზუსტად აჩვენა თავისი ამბიცია - შექმნას უდიდესი და უძლეველი რუსეთი - და მხოლოდ იმიტომ, რომ მან კიევის აღება ვერ შეძლო, არ ნიშნავს, რომ თავის ამბიციებს უღალატა". - აღნიშნავს თრასი The Telegraph-თან ინტერვიუში.

ასევე, დიდმა ბრიტანეთმა, აშშ-მ, საფრანგეთმა და გერმანიამ იმსჯელეს იმაზეც, მოაწერონ თუ არა ხელი უკრაინის უსაფრთხოების გარანტორი ქვეყნების ფორმას, რათა კიევში იარაღისა და სხვა სახის დახმარების მიწოდება გრძელვადიან პერსპექტივაშიც გაგრძელდეს.

25-26 აპრილს მოლდოვაში სამი აფეთქება მოხდა. პირველად ყუმბარმტყორცნიდან სეპარატისტული რეგიონის ე.წ. უსაფრთხოების სამინისტროს შენობას ესროლეს. ამას მოჰყვა ტირასპოლის მახლობლად მყოფ სოფელში სამხედრო ნაწილში მომხდარი აფეთქება, შემდეგ კი მაიაკის დასახლებასთან რადიოგადამცემი ხაზების აფეთება მოხდა. 

25 აპრილს მოლდოვის რეინტეგრაციის ბიურო გამოეხმაურა სეპარატისტულ რეგიონში მომხდარ პირველ შემთხვევას და ინციდენტის მიზნად სიტუაციის გამწვავების საბაბის შექმნა დაასახელა.

მოლდოვის პრეზიდენტმა, მაია სანდუმ, დნესტრისპირეთის გარშემო არსებულ დაძაბულობასთან დაკავშირებით, უშიშროების საბჭო მოიწვია.

ასევე, რუსეთის ცენტრალური სამხედრო ოლქის მეთაურის მოადგილემ, გენერალ-მაიორმა რუსტამ მინეკაევმა სვერდლოვსკის რეგიონის თავდაცვის მრეწველობის კავშირის ყოველწლიურ შეხვედრაზე უკრაინაში ომის მეორე ეტაპის მიზნები დაასახელა. მიზნებში ნახსენები იყო დნესტრისპირეთთან სახმელეთო დერეფნის შექმნა.

"უკრაინის სამხრეთზე კონტროლი – ეს კიდევ ერთი გზაა დნესტრისპირეთისკენ,  სადაც ასევე ხდება რუსულენოვანი მოსახლეობის შევიწროების ფაქტები. როგორც ჩანს, ახლა მთელ მსოფლიოს ვეომებით, როგორც დიდ სამამულო ომში იყო, მთელი ევროპა, მთელი მსოფლიო ჩვენს წინააღმდეგ იყო. ახლაც ასეა, მათ რუსეთი არასდროს ჰყვარებიათ". – ამბობდა მინეკაევი.

მოლდოვის პრეზიდენტის, მაია სანდუს თქმით, "დნესტრისპირეთში არის დაძაბულობა სხვადასხვა ძალებს შორის, რომლებიც სიტუაციის დესტაბილიზაციით არიან დაინტერესებული".

უკრაინის დაზვერვის ინფორმაციით, დნესტრისპირეთში მომხდარი ინციდენტი რუსეთის სპეცსამსახურების მიერ დაგეგმილი იყო, ხოლო დნესტრისპირეთის ე.წ. პრეზიდენტი ადანაშაულებს კიევს და ამბობს, რომ თავდასხმების კვალი უკრაინამდე მიდის.

27 აპრილს დნესტრისპირეთის სეპარატისტულმა ე.წ. მთავრობამ უკრაინა რუსული იარაღის საწყობის მიმართულებით სროლაში დაადანაშაულა.

1990-1992 წლებში მოლდოვაში მიმდინარეობდა დნესტრისპირეთის კონფლიქტი. დაძაბულობამ პიკს 1992 წელს მიაღწია, როდესაც საბჭოთა კავშირი უკვე დაშლილი იყო და გამოცხადებული იყო მოლდოვის რესპუბლიკა. ომი სამშვიდობო შეთანხმებით ამავე წელს დასრულდა.

დნესტრისპირელ სეპარატისტებს, რომელთა უმრავლესობა ეთნიკური რუსი იყო, მხარს უჭერდა ყოფილი საბჭოთა კავშირის, შემდეგ კი უკვე რუსეთის მე-14 გვარდიული არმია. რუსი სამხედროები დნესტრისპირეთში დღესაც დგანან. სეპარატისტული რეგიონი უკრაინას ესაზღვრება. დნესტრისპირეთის კონფლიქტი უკვე რამდენიმე წელია, რაც გაყინულ კონფლიქტად ითვლება.

კომენტარები