კომპანია Microsoft-მა უახლესი ოპერაციული სისტემა, Windows 11 წარმოადგინა, რომელიც განახლებული დიზაინითა და ფუნქციური შესაძლებლობებით გამოირჩევა.
Windows 10-ის მომხმარებლები 11-ს სრულიად უფასოდ, პირდაპირ განახლების ცენტრიდან მიიღებენ.
Microsoft-ის წარმომადგენლობის თქმით, უმთავრეს ვიზუალურ ცვლილებას ეკრანის ცენტრში გადმონაცვლებული მენიუ წარმოადგენს, რომლის შეცვლაც, სურვილის შემთხვევაში, მომხმარებლებს შეეძლებათ.
Apple-ისა და Google-ისგან განსხვავებით, Microsoft-ი საკუთარი ეკოსისტემის ჩაკეტვას და მომხმარებლის ციფრული კედლის შიგნით მოქცევას არ გეგმავს.
"Windows-ის დანიშნულებაა, იყოს ყველაზე ღია და მეგობრული ეკოსისტემა, რომელიც კარგად იმუშავებს სხვა სისტემებთან" – თქვა Microsoft-ის აღმასრულებელმა დირექტორმა, სატია ნადელამ.
აღნიშნული მიზნის მისაღწევად Windows 11-ს სმარტფონებისთვის გათვლილი აპლიკაციების მხარდაჭერა ექნება, ანუ მომხმარებლებს პირდაპირ ვინდოუსიდან შეეძლებათ ისეთი აპლიკაციებით სარგებლობა, როგორიცაა: TikTok-ი და Tinder-ი.
შეცვლილია ვიჯეტებისა და ახალი ამბების პანელიც.
გარდა ვიზუალური ცვლილებებისა, განახლება ტექნიკურ გაუმჯობესებასაც მოიცავს:
- სწრაფი ჩართვა და მოქმედება;
- გაზრდილი უსაფრთხოება და დაცულობა;
- განახლებების ზომის 40%-ით შემცირება;
- ენერგოეფექტიანობის ზრდა;
- თამაშების უკეთესი მხარდაჭერა და ოპტიმიზაცია;
Windows 11 ჯერაც საპილოტე გამოცდის რეჟიმშია და, სავარაუდოდ, მას 2021 წელს გაუშვებენ.