სენატორ რობ პორტმანის თქმით, დღის განმავლობაში საქართველოს ხელისუფლების და სამოქალაქო საზოგადოების წარმომადგენლებთან შეხვედრებზე სენატორებმა ხაზი გაუსვეს რეფორმების მხარდაჭერას. სენატორმა აღნიშნა, რომ რეფორმების გატარება საქართველოს ევროატლანტიკური ინტეგრაციისთვის ძალიან მნიშვნელოვანია.
"ეს არის მნიშვნელოვანი, რადგან ჩვენ გვჯერა, რომ საქართველოს დასავლეთთან გაერთიანება არ უნდა იყოს მხოლოდ მისწრაფება, საქართველო უნდა გაერთიანდეს დასავლეთთან და უნდა შევიდეს NATO-ში. არსებობს პროცესი, MAP-ი, რომელიც NATO-ს წევრობისთვის შემდეგი ნაბიჯია, ჩვენ გვჯერა, რომ საქართველო იმსახურებს NATO-ს წევრობის გზაზე ყოფნას, შესაძლებლობას, შეუერთდეს MAP-ის პროცესს. ამას გადაწყვეტს არა აშშ, არამედ NATO-ს ყველა წევრი და ამისთვის საჭიროა გარკვეული რეფორმები. ესაა მიზეზი, რატომ არის რეფორმები ასეთი მნიშვნელოვანი." - თქვა სენატორმა რობ პორტმანმა პრესკონფერენციაზე.
აშშ-ს კონგრესის დელეგაცია სენატორ ჯინ შაჰინის და ხელმძღვანელობითა და სენატორ რობ პორტმანის მონაწილეობით საქართველოში დღეს, 3 ივნისს ჩამოვიდა. სენატორებმა შეხვედრები გამართეს პრეზიდენტთან, პრემიერმინისტრთან, საგარეო საქმეთა მინისტრთან, პარლამენტის თავმჯდომარესთან, სამოქალაქო საზოგადოების წარმომადგენლებთან. ასევე იგეგმება შეხვედრა ოპოზიციასთან.
ჯინ შაჰინი ნიუ-ჰემფშირის შტატის დემოკრატი სენატორია, ხოლო რობ პორტმანი ვისკონსინის შტატის რესპუბლიკელი სენატორი. შაჰინი და პორტმანი აშშ-ს სენატის საგარეო ურთიერთობათა კომიტეტის წევრები არიან.