ვაქცინაცია საქართველოში

სინოვაკზე რეგისტრაცია 21 მაისს დაიწყება, ვაქცინაცია – 24 მაისს

სინოვაკი

ჩინურ სინოვაკზე რეგისტრაცია 21 მაისს დაიწყება, ხოლო ვაქცინაციის პროცესი – 24 მაისს. ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ ტელეკომპანია იმედს უთხრა. 

გამყრელიძის თქმით, აცრა 18 წლის ზემოთ მოსახლეობისთვისაა განსაზღვრული. 

"ამ ვაქცინის ეფექტურობა ინდონეზიის კვლევებით ადის 90%-მდე. ჯანმო-ს არ დაველოდებით, რადგან უკვე პირველი ჩინური ვაქცინა, პირველი დოზები თითქმის ამოწურულია. მოთხოვნილება დიდია საკმაოდ ქვეყანაში, უკვე იზრდება ვაქცინაციის პროცესის მიმართ და არ არის სასურველი, რომ შევაჩეროთ". – ამბობს გამყრელიძე. 

სინოვაკს ამ ეტაპზე ჯანდაცვის მსოფლიო ორგანიზაციის ავტორიზაცია არ აქვს. 

კანონით, საქართველოს აცრები მხოლოდ WHO-ს ან "რომელიმე მკაცრი მარეგულირებლის" მიერ აღიარებული ვაქცინით უნდა დაეწყო. სინოფარმის შემთხვევაში საქართველოს მთავრობა უნგრეთის მარეგულირებელს ასახელებდა. სინოვაკზე საუბრისას კი, ჯანდაცვის მინისტრის მოადგილე ამბობს, რომ კანონის ეს ჩანაწერი არ ნიშნავს ვაქცინის "გამოყენების შეუძლებლობას". თამარ გაბუნიას თქმით, შემუშავებულია დადგენილება, რომელიც დააზუსტებს, რა შემთხვევაში მოხდება ვაქცინის გამოყენება.


ჯანდაცვის მსოფლიო ორგანიზაციის სტრატეგიულმა საკონსულტაციო ექსპერტთა ჯგუფის (SAGE) გამოქვეყნებული მასალებით, ჩინური ვაქცინის, სინოვაკის ეფექტიანობა ორი დოზის მიღების შემდეგ 50.7%-ით განისაზღვრა, რაც ბრაზილიაში ჩატარებული კვლევის მე-3 ფაზით დადგინდა. ამასთან ერთად, ჰოსპიტალიზაციის შემთხვევაში სინოვაკის ეფექტიანობა 100%-მდე იზრდება, რაც ნიშნავს იმას, რომ სინოვაკი კორონავირუსით დაავადებულს იცავს გართულებებისგან. შეგახსენებთ, რომ 50%-ზე მეტი ეფექტიანობა საკმარისია იმისათვის, რომ ვაქცინამ რეკომენდაცია მიიღოს მსოფლიო ჯანდაცვის ორგანიზაციისგან.

სინოვაკის ეფექტიანობის კვლევაში სულ 12,310-მა მიიღო მონაწილეობა. კვლევა ძირითადად ჩატარებულია 18-დან 59 წლამდე ასაკობრივ კატეგორიაში - 12,098 მონაწილე და 60 წელს გადაცილებული მხოლოდ 212 მონაწილე.

ამავე დოკუმენტის მიხედვით, სინოვაკის გამოყენების შემდეგ ძირითადი გვერდითი  მოვლენაა თავის ტკივილი, დაღლილობა, ნანემსარი ადგილის ტკივილი, კუნთების ტკივილი. ამასთან ერთად, ძირითადად ალერგიული რეაქციის მხოლოდ მსუბუქი ფორმები ვლინდება. 

ჩინეთის კვლევებზე დაყრდნობით, სერიოზული გვერდითი მოვლენა 35.8 მილიონიდან მხოლოდ 45 ადამიანს გამოუვლინდა. ინდოეთში 17 მილიონიდან 162-ს, ხოლო ჩილეში 3.7 მილიონიდან 90-ს, აქედან ანაფილაქსიის შემთხვევა ძალიან მცირეა -  1.7/100,000.

სინოვაკის ვაქცინა გამოიყენება თურქეთში, ჩილეში, ინდონეზიაში, ბრაზილიაში. აქედან თურქეთის კვლევებში სინოვაკის ეფექტიანობა 84%-ით არის განსაზღვრული, ინდონეზიაში 65%-ით, ჩილეში - 67%-ით, ხოლო ბრაზილიის ორივე კვლევაში 50-51%-ით.

ჯანდაცვის მსოფლიო ორგანიზაციამ სინოვაკის ავტორიზაციასთან დაკავშირებით სხდომა 29 აპრილს გამართა, თუმცა საბოლოო პასუხი გადადო.

WHO-მ სინოფარმთან დაკავშირებითაც გამოაქვეყნა დოკუმენტი, რომლის მიხედვითაც სინოფარმის ეფექტიანობა 78.1%-ით განისაზღვრა, რაც მრავალ ქვეყანაში ჩატარებული მე-3 ფაზის კვლევის შედეგებით დადგინდა

სინოვაკის ვაქცინის 100 000 დოზა საქართველოში 29 აპრილს ჩამოვიდა. ეს ვაქცინები ქვეყანას ჩინეთმა აჩუქა.

კომენტარები