აშშ-ს პრეზიდენტ ჯო ბაიდენის განცხადებით, 24 მაისიდან კომპანიები Uber-ი და Lyft-ი აშშ-ში უფასო მომსახურებას შესთავაზებენ იმ პირებს, რომლებსაც აცრის ადგილას სურთ წასვლა.
ბაიდენის ადმინისტრაციას ქვეყანაში COVID-19-ს საწინააღმდეგო აცრის წახალისება სურს.
მისი სურვილია, 4 ივლისისთვის ზრდასრულების 70% აცრილი იყოს, რათა უსაფრთხოდ გახსნან ქვეყანა დამოუკიდებლობის დღეს მცირერიცხოვანი შეკრებებისთვის. ამ დროისთვის, მოსახლეობის 46.2%-ს ვაქცინის ერთი დოზა მაინც აქვს გაკეთებული.
თეთრი სახლის განცხადებით, აცრის ადგილები მოეწყობა ასევე კოლეჯებში. ბაიდენი განიხილავს ფედერალური საგანგებო სიტუაციების მენეჯმენტის სააგენტოს წარმომადგენლების გაგზავნას ქვეყნის მასშტაბით, რათა ადამიანები ვაქცინის გასაკეთებლად წაახალისონ.
