ჩინეთის მიერ კვლევასა და განვითარებაზე (R&D) დახარჯულმა თანხებმა ახალ რეკორდულ ნიშნულს მიაღწია, კერძოდ, 2020 წელს დაიხარჯა 2.44 ტრილიონი იუანი, ანუ 378 მილიარდი დოლარი.
ჩინეთის სტატისტიკის ბიუროს ინფორმაციით, R&D-ზე დახარჯული თანხები ქვეყნის მშპ-ის 2.4%-ია.
2019 წელთან შედარებით R&D ხარჯები 10.3%-ითაა გაზრდილი, თუმცა ეს ბოლო ხუთი წლის განმავლობაში ყველაზე მცირე პროცენტული ზრდაა, 2019 წელს ეს მაჩვენებელი 12.5% იყო.
ჩინეთის წარმომადგენლების თქმით, 2020 წლის ბოლოს ქვეყანაში 522 ლაბორატორია და 350 საინჟინრო კვლევითი ცენტრი ფუნქციონირებდა.
ჩინეთისაგან განსხვავებით, 2020 წელს აშშ კვლევასა და განვითარებაში 134 მილიარდი დოლარის დახარჯვას გეგმავდა. ზუსტი მონაცემები ჯერაც არ არის ცნობილი.
ანალიტიკოსთა ნაწილი მიიჩნევს, რომ ჩინეთის მხრიდან R&D დანახარჯების ასეთი ზრდა აშშ-ჩინეთის სავაჭრო და ტექნოლოგიური დაპირისპირებითაა გამოწვეული.
მათი თქმით, ჩინეთის კომუნისტური მთავრობის სურვილია მოიპოვოს ტექნოლოგიური დამოუკიდებლობა, განსაკუთრებით კი ისეთ სფეროებში, როგორებიცაა: ნახევარგამტარები, 5G და ხელოვნური ინტელექტი.
