შინაგან საქმეთა სამინისტროს ინფორმაციით, ქვემო ქართლში 42 შეკვრად დაფასოებული ჰეროინი ამოიღეს. დაკავებულია ორი ადამიანი - 1975 წელს დაბადებული მ.ა. და 1983 წელს დაბადებული მ.მ.
უწყების ინფორმაციით, ბრალდებულები გარდაბნის მუნიციპალიტეტში გააჩერეს - ისინი მ.მ.-ს მიკროავტობუსით გადაადგილდებოდნენ. შსს-ს ცნობით, ნარკოტიკული საშუალება მათი პირადი ჩხრეკისას ამოიღეს.
შსს-ს ინფორმაციით, განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ფაქტზე გამოძიება საქართველოს სისხლის სამართლის კოდექსის 260-ე მუხლის მეექვსე ნაწილის "ა" ქვეპუნქტით მიმდინარეობს. დანაშაული 8-დან 20 წლამდე ან უვადო თავისუფლების აღკვეთას ითვალისწინებს.