კორონავირუსი იტალიაში

იტალიაში COVID-19-თან დაკავშირებული შეზღუდვების გამო საპროტესტო აქციები გაიმართა - PHOTOS

იტალიაში COVID-19-თან დაკავშირებული შეზღუდვების გამო დაწყებულმა პროტესტმა ძალადობრივი სახე მიიღო. იტალიის სხვადასხვა ქალაქში დემონსტრაციები მას შემდეგ დაიწყო, რაც შეზღუდვების შესახებ ახალი განკარგულება 26 სექტემბერს ძალაში შევიდა.

ტურინში დემონსტრანტებმა პოლიციის წინააღმდეგ საწვავის ჭურვები გამოიყენეს.მათ ქალაქის ცენტრში მაღაზიები გაძარცვეს. პოლიცია და დემონსტრანტები ერთმანეთს მილანშიც დაუპირისპირდნენ, აქციების დასაშლელად პოლიციამ ცრემლსადენი გაზი გამოიყენა. აქციები გაიმართა რომში, გენუასა და პალერმოშიც. პროტესტის დროს დემონსტრანტები სასიგნალო პისტოლეტებს იყენებდნენ.

ახალი კორონავირუსით დაავადების შემთხვევების ზრდის გამო იტალიაში საცურაო აუზები, სპორტული დარბაზები და კინოთეატრები დაიხურა. გარდა ამისა, საღამოს 6 საათიდან დაიხურება ბარები და რესტორნები.

შეზღუდვების გამკაცრებაზე ქვეყნის პრემიერმინისტრი ჯუზეპე კონტე და რეგიონული ლიდერები შეთანხმდნენ.

კონტემ განაცხადა, რომ არ სურს კარანტინის მთელი ქვეყნის მასშტაბით შემოღება ისე, როგორც ეს ვირუსის პირველი ტალღის დროს გააკეთეს, ვინაიდან ამან ქვეყნის ეკონომიკას ზარალი მიაყენა.

იტალიაში შეზღუდვები გამკაცრდა გასულ კვირასაც. ქალაქების მერებს მიენიჭათ უფლება, დახურონ საჯარო დაწესებულებები საღამოს 9 საათიდან. შემცირდა ამ დაწესებულებებში, მათ შორის რესტორნებსა და კაფე-ბარებში ადამიანთა დასაშვები რაოდენობაც. გადაიდო კონფერენციები და ფესტივალები.

პანდემიის დაწყებიდან იტალიაში ვირუსით დაავადდა 542 789 ადამიანი, გარდაიცვალა - 37,479.

კომენტარები