დავითგარეჯის საქმე

ბოკერია მელაშვილის და ილიჩოვას საქმეზე: მათ ედავებიან იმას, რაც არ მომხდარა

ივერი მელაშვილისა და ნატალია ილიჩოვას დაპატიმრება ივანიშვილის რეჟიმის უმდაბლესი სტანდარტებითაც კი სამარცხვინო შემთხვევაა.

ამ ორ ადამიანს ედავებიან იმას, რაც არ მომხდარა. საქართველოსა და აზერბაიჯანს შორის სადემარკაციო შეთანხმება დავითგარეჯის მონასტრის მონაკვეთში არაა მიღწეული. ის, რომ ამ ადამიანების წინააღმდეგ ბრალდება აბსურდულია, ყველამ იცის, თავად ხელისუფლების შიგნითაც.

მაშინ, როცა ჩვენს ორ მეზობელ ქვეყანას შორის ომი მიმდინარეობს, ხელისუფლების მხრიდან ამ თემაზე საქმის ფაბრიკაცია, საქართველოში სამოქალაქო მშვიდობისთვის საფრთხეს ქმნის, ეთნიკური და რელიგიური შუღლის გამღვივებლებს საზრდოს აძლევს, მეზობელ ქვეყანასთან კი დამატებით პრობლემებს გვიქმნის.

ამ საქმეში ძალიან გამჭვირვალედ ჩანს ივანიშვილის ხელისუფლების თანამშრომლობა ღიად პროპუტინურ ჯგუფებთან. ეს თემა მათი მეშვეობით შეიქმნა და ისინი სრულ ჰარმონიაში მოქმედებენ, როგორც პროკურატურასთან, ისე ქართული ოცნების პროპაგანდასთან.

რუსეთი ივანიშვილის ხელისუფლების დასახმარებლად და საქართველოში სამოქალაქო მშვიდობის დასარღვევად 2020 წლის საპარლამენტო არჩევნებში აქტიურადაა ჩართული. ტყუილისა და აბსურდის ნიაღვარი, რომელსაც ივანიშვილის ყოველთვის ასაზრდოებდა, ახლა სრულადაა მომართული ამ თემის ასატაცებლად.

შეთითხნილი საქმით ოპოზიციის დემონიზება და მათ მიმართ სიძულვილის კამპანიის წარმოება, ნაყალბევი მაგრამ უმძიმესი ბრალდებით - ქვეყნის ღალატი. მიზანი იგივეა - პოლარიზაცია, რითაც ამომრჩეველს კვლავ ცრუ, შავ-თეთრ არჩევანს უხატავს ივანიშვილის პროპაგანდა.

ეს ყველაფერი კიდევ ერთი და უმძიმესი მაგალითია, თუ რატომაა ივანიშვილის ხელისუფლების დასრულება ჩვენი ქვეყნის ეროვნული ამოცანა. ეს 31 ოქტომბერს უნდა მოხდეს.

ფოთში, ხობსა და სენაკში ევროპული საქართველოს მაჟორიტარი დეპუტატობის კანდიდატი, გიგა ბოკერია, საქართველო-აზერბაიჯანის დემარკაციის კომისიის ექსპერტთა საბჭოს უფროსის, ივერი მელაშვილისა და წევრის, ნატალია ილიჩოვას აღკვეთის ღონისძებად პატიმრობის შეფარდების გადაწყვეტილებას თავის Facebook-ის გვერდზე გამოეხმაურა.

კომენტარები