ირანმა ორი ბალისტიკური რაკეტის გამოცდა ჩაატარა. ამის შესახებ ინფორმაციას ავრცელებს ქვეყნის თავდაცვის მინისტრი ამირ ჰატამი.
მისი თქმით, ერთ-ერთ რაკეტას 1 400 კილომეტრის დაფარვა შეუძლია და მას სახელი "მოწამე ყასემ სოლეიმანი" ირანელი გენერლის პატივსაცემად ეწოდა. მეორე რაკეტას, რომელიც 1 000 კილომეტრს ფარავს, სახელად "მოწამე აბუ მაჰდი" ჰქვია.
"ჩვენთვის რაკეტები მნიშვნელოვანია. ის ფაქტი, რომ რადიუსი 300-დან 1000 კილომეტრამდე 2 წელიწადზე ნაკლებში გავზარდეთ დიდი მიღწევაა". - თქვა ირანის პრეზიდენტმა ჰასან როუჰანიმ. ის ირწმუნება, რომ სარაკეტო პროგრამა თავდაცვით მიზნებს ემსახურება.
ირანის ისლამური რევოლუციის გუშაგთა კორპუსის, ელიტარული ქვედანაყოფის ყუდსის მეთაური, გენერალი, ყასემ სოლეიმანი ბაღდადის აეროპორტის მახლობლად ამერიკული დრონის ავიაიერიშის დროს მიმდინარე წლის იანვარში მოკლეს. ამავე იერიშისას მოკვდა ერაყის სამხედრო დაჯგუფების მეთაური აბუ მაჰდი ალ-მუჰანდისი.
აშშ ირანს კვლავ მოუწოდებს შეწყვიტოს სარაკეტო პროგრამა. ახალი რაკეტების გამოცდის პარალელურად ტრამპის ადმინისტრაცია აპირებს აამოქმედოს გაეროს უშიშროების საბჭოს მექანიზმი, რომელიც 2015 წლის ირანის ბირთვული შეთანხმების შემდგომ მოხსნილ ყველა სანქციას დააბრუნებს.