პოლონელი დეპუტატი, მალგოჟატა მარია გოშიევსკა საქართველოს მთავრობას პოლონეთის მოქალაქეებისთვის საზღვრების უპირობოდ არგახსნის გამო აკრიტიკებს.
სეიმის წევრი წერს, რომ საქართველოს ტურიზმის ეროვნული ადმინისტრაციის მონაცემებიდან ჩანს, რომ 2019 წელს საქართველოს ესტუმრა 88 300 პოლონელი ტურისტი. დეპუტატი ამ რიცხვებს გერმანიის, საფრანგეთის, ლიტვის, ლატვიისა და ესტონეთის მონაცემებს ადარებს - იმ ხუთი ქვეყნისას, რომელთა მოქალაქეებსაც საქართველო საზღვარს უპირობოდ უხსნის.
"რას ნიშნავს ეს პოლონეთისთვის, რომელიც ყოველთვის მხარს უჭერდა საქართველოს განვითარების ყველა სფეროს?
საქართველოს ხელისუფლების განცხადებიდან ირკვევა, რომ მიმდინარეობს მოლაპარაკებები გერმანიის, საფრანგეთისა და ბალტიის ქვეყნების ავიაკომპანიებთან საქართველოს მიმართულებით რეგულარული ფრენების აღდგენასთან დაკავშირებით.
რადგან ყოველწლიურად არდადეგების პერიოდში უამრავი პოლონელი მიემგზავრება საქართველოში, შეგვიძლია, ვიფიქროთ, რომ საქართველოს მთავრობის გადაწყვეტილება უშუალოდ ზიანს აყენებს პოლონურ ავიაკოპანია LOT-ს.
მთავრობის გადაწყვეტილება გაუგებარია, მისი ახსნა ეპიდემიოლოგიური საფრთხის თვალსაზრისით არ არის მართებული, რადგან ბოლო 7 დღის განმავლობაში კორონავირუსით ინფიცირებულთა რაოდენობა ყოველდღიურად გერმანიაში 500-ით მეტია ვიდრე პოლონეთში (ინფიცირებულთა რიცხვი: გერმანია - 2 441 , პოლონეთი -1 914).
უნდა აღინიშნოს, რომ ეპიდემიის დროს პოლონეთმა საქართველო არ დატოვა დახმარების გარეშე და ივნისში, სოლიდარობისა და თანამშრომლობის ფარგლებში, ვირუსთან საბრძოლველად პერსონალური დაცვის ეკიპირების სახით ჰუმანიტარული დახმარება გადასცა, რომელის ღირებულებაც 183 000 ზლოტს შეადგენდა.
ზემოაღნიშნულის გათვალისწინებით ჩნდება კითხვა, ვის ინტერესებს წარმოადგენს საქართველოს მთავრობა?". – წერს დეპუტატი.
მიუხედავად იმისა, რომ ევროკავშირის საბჭომ საქართველო 14 ქვეყანასთან ერთად ახალი კორონავირუსისგან უსაფრთხო ქვეყნების სიაში შეიყვანა და წევრ სახელმწიფოებს მისცა რეკომენდაცია, ამ 15 ქვეყანასთან საზღვრები გაეხსნათ, სახელმწიფოები გადაწყვეტილებებს ინდივიდუალურად იღებენ.
პოლონეთს ამ დრომდე არ უთქვამს ოფიციალურად, შეუშვებს, თუ არა საქართველოს მოქალაქეებს თავის ტერიტორიაზე. თუმცა, 2 ივლისს ეკონომიკის მინისტრმა, ნათია თურნავამ თქვა, რომ პოლონეთი საქართველოსთვის საზღვრებს გახსნიდა.
ამასთან, 10 ივლისს ინფრასტრუქტურის მინისტრმა, მაია ცქიტიშვილმა მალგოჟატა მარია გოშიევსკას პოსტთან დაკავშირებით თქვა, რომ პოლონეთი მზადყოფნას გამოთქვამდა საქართველოსთან საზღვრის გახსნის, თუმცა, მინისტრის თქმით, პოლონეთის ეპიდემიური მდგომარეობის გამო, საქართველოს მთავრობამ მიიღო გადაწყვეტილება, საზღვარი არ გაეხსნა.
ახალ კორონავირუსთან დაკავშირებით შექმნილი მთავრობის საკოორდინაციო საბჭოს გადაწყვეტილებით, საქართველო 8 ივლისიდან, ორმხრივი შეთანხმების საფუძველზე, უპირობოდ ხსნის საზღვრებს ევროკავშირის წევრი ხუთი ქვეყნის: გერმანიის, საფრანგეთის, ლიტვის, ლატვიისა და ესტონეთისთვის. ამ სიაში პოლონეთი ვერ მოხვდა.
ამ ხუთი ქვეყნიდან შემოსულ ადამიანებს საქართველოში კარანტინის გავლა არ დასჭირდებათ.
საზღვრები იხსნება საქართველოს მოქალაქეებისთვისაც. როგორც ტაბულას მთავრობის პრესსამსახურში უთხრეს, საქართველოს მოქალაქეებს ასევე 8 ივლისიდან შეუძლიათ იმოგზაურონ ევროკავშირის წევრ ქვეყნებში, თუმცა იქიდან დაბრუნებულებს 14-დღიანი სავალდებულო კარანტინის გავლა დასჭირდებათ. კარანტინის გავლა მათ ზემოთ ჩამოთვლილი ევროკავშირის ხუთი ქვეყნიდან დაბრუნების შემდეგაც მოუწევთ.
