თბილისის ინფექციური საავადმყოფოს სამედიცინო დირექტორის, მარინა ეზუგბაიას ინფორმაციით, ბათუმიდან გადმოყვანილი დედა-შვილის მდგომარეობა სტაბილურია და ამ ეტაპზე დაავადების პროგრესირება მოსალოდნელი არ არის. ეზუგბაიას თქმით, "ჩატარებული გაფართოებული კვლევები დააზუსტებს მათ მდგომარეობას".
40 წლის დედა და ათი წლის შვილი, 4 აპრილს საქართველოში თურქეთიდან შემოვიდნენ. ისინი 11 აპრილამდე კარანტინში იმყოფებოდნენ. მათ გუშინ ტემპერატურის მატება დაუფიქსირდათ, გამოკვლევების შემდეგ კი კორონავირუსი დაუდასტურდათ.
ბოლო მონაცემებით, საქართველოში კორონავირუსის დადასტურებული შემთხვევები 10-ით გაიზარდა. სულ ამ დროისათვის ქვეყანაში კორონავირუსის 252 შემთხვევაა დადასტურებული. 60 ადამიანი უკვე გამოჯანმრთელდა, 3 კი გარდაიცვალა.
