NDI-ის კვლევა

NDI: დავით ბაქრაძე და კახა კალაძე თანაბრად მოსწონთ, მათი მაჩვენებელი ყველაზე მაღალია

​ეროვნულ-დემოკრატიული ინსტიტუტის (NDI) კვლევის თანახმად, მოსახლეობას ევროპული საქართველოს ერთ-ერთი ლიდერი, დავით ბაქრაძე და ქართული ოცნების გენერალური მდივანი, კახა კალაძე თანაბრად მოსწონს. ორივე მათგანის მოწონების მაჩვენებელი 34%-ია.

თითქმის იდენტურია უარყოფითი შეფასებებიც - კალაძეს უარყოფითად 22% აფასებს, ბაქრაძეს 21%.

რაც შეეხება სხვა პოლიტიკოსებს, მოწონების მაჩვენებლით რეიტინგში მესამე შალვა ნათელაშვილია. მხოლოდ შემდეგ მოდის პრემიერმინისტრი გიორგი გახარია, თუმცა მას უარყოფითი შეფასება ბევრად მეტი (34%) აქვს, ვიდრე ნათელაშვილს (25%).

ქართული ოცნების ლიდერის, ბიძინა ივანიშვილის დადებითი შეფასება ერთ-ერთი ყველაზე დაბალია. უფრო მეტი ადამიანი აფასებს დადებითად მიხეილ სააკაშვილს, გრიგოლ ვაშაძეს, ნიკა მელიას, ალეკო ელისაშვილს, ელენე ხოშტარიას, გიორგი ვაშაძეს, დავით უსუფაშვილს, ირმა ინაშვილს.

გარდა ამისა, ბიძინა ივანიშვილს ახალ გამოკითხვაში უფრო მეტი ადამიანი აფასებს უარყოფითად, ვიდრე წინაში. ქართული ოცნების ლიდერის უარყოფითი შეფასების მაჩვენებელი 10%-ით გაიზარდა - თუ 2019 წლის აპრილში ჩატარებულ გამოკითხვაში მას უარყოფითად აფასებდა 39%, ახალ კვლევაში, რომელიც 2019 წლის ნოემბერ-დეკემბერში ჩატარდა, ივანიშვილს უარყოფითად აფასებს მოსახლეობის თითქმის ნახევარი - 49%.

​NDI-ის​​ დაკვეთით საველე სამუშაოები ჩატარდა 19 ნოემბრიდან 13 დეკემბრის პერიოდში, საქართველოს მასშტაბით (ოკუპირებული ტერიტორიების გამოკლებით) ჩატარდა. კვლევა ეყრდნობა 2,181 პირისპირ ინტერვიუს წარმომადგელობითი შერჩევის საფუძველზე. საშუალო ცდომილების ზღვარი 1.9%.

NDI-ის კვლევები დიდი ბრიტანეთის მთავრობის UK aid-ის მხარდაჭერით ფინანსდება. საველე სამუშაოები CRRC–საქართველომ ჩაატარა.

კომენტარები