ევროპული საქართველოს წევრის გიგა ბოკერიას თქმით, ოპოზიციის წარმომადგენლები და აქტივისტები ყველა ბერკეტს გამოიყენებენ, რომ ხელისუფლების წევრებს ყველა ნაბიჯზე მაქსიმალური დისკომფორტი შეუქმნან.
"ამ ხალხს არ დაუმსახურებია მინიმალური კომფორტიც კი, ამიტომ მოვედით აქ. იმდენი პოლიცია ჰყავთ მობილიზებული, შეაპარებენ ბოლო-ბოლო, აი ასე, შეპარვით უნდა იყვნენ. სადაც ხალხს ნახავენ უნდა გარბოდნენ. ახლა ვნახავთ, რომელიმე ადგილი ხო არ არის, სადაც შედარებით ნაკლებად არაკომფორტულად შედიან პარლამენტში და იქაც გადავინაცვლებთ" - აღნიშნა ბოკერიამ.
ამ წუთებში პარლამენტში სესია მიმდინარეობს, შენობის მიმდებარე ტერიტორიაზე აქციის მონაწილეები უცვლელი მოთხოვნით რჩებიან.
ხელისუფლებამ პარლამენტთან მშვიდობიანი საპროტესტო აქციის სპეციალური დანიშნულების რაზმის გამოყენებით დაშლა დილის 05:00 საათზე დაიწყო. მიუხედავად იმისა, რომ აქციის მონაწილეებს კანონი არ დაურღვევიათ და მათ გზის სავალი ნაწილიდან ტროტუარებზე გადაინაცვლეს, სპეცრაზმელებმა მოქალაქეების წინააღმდეგ წყლის ჭავლი მაინც გამოიყენეს.
აქციის მონაწილეები პარლამენტის შესასვლელების პიკეტირებას გეგმავდნენ, რათა დეპუტატები პლენარულ სხდომაზე არ შეეშვათ. ახლა ყველა შესასვლელი სპეცრაზმს აქვს დაკავებული.
დემონსტრანტები პარლამენტის მიმდებარე ტერიტორიაზე ამ დრომდე რჩებიან. მათი მოთხოვნა უცვლელია - ბიძინა ივანიშვილმა შეასრულოს 24 ივნისს გაცემული დაპირება და 2020 წლის საპარლამენტო არჩევნები პროპორციული წესით ჩატარდეს. ისინი ხელისუფლებას გერმანულ მოდელს სთავაზობენ.
აქტივისტებმა და ოპოზიციამ პიკეტირება ერთი კვირის წინაც მოაწყვეს - 17 ნოემბრის ღამით მათ ბოქლომები დაადეს პარლამენტს, 18 ნოემბერს ხელისუფლებამ პიკეტი სპეცრაზმის გამოყენებით მოხსნა და 37 ადამიანი დააკავა. მათ დიდ ნაწილს ადმინისტრაციული პატიმრობა შეუფარდეს.
ქართულმა ოცნებამ 14 ნოემბერს ჩააგდო საკონსტიტუციო კანონის პროექტი, რომლის მიხედვითაც 2020 წლის არჩევნები პროპორციული წესით უნდა ჩატარებულიყო. ამით მმართველმა გუნდმა ბიძინა ივანიშვილის დაპირება არ შეასრულა, რომელიც მან ანტირუსული მშვიდობიანი აქციის ძალადობრივად დაშლის და ფართომასშტაბიანი დემონსტრაციების შემდეგ გასცა.
