დღეს იაპონიის იმპერატორმა ნარუჰიტომ ტოკიოს იმპერიულ სასახლეში ფორმალური ცერემონიალით საიმპერატორო ტახტი დაიკავა.
"ვფიცავ, რომ კონსტიტუციით ვიმოქმედებ და როგორც სახელმწიფოსა და ხალხის ერთიანობის სიმბოლო, ჩემ მოვალეობას შევასრულებ," - თქვა იმპერატორმა.
ნარუჰიტოს გვერდით იდგა მისი მეუღლე მასაკო.
პერმიერმინისტრმა სინძო აბემ ნარუჰიტოს ტახტზე ასვლა მიულოცა, რასაც მოჰყვა შეძახილები - "დიდხანს სიცოცხლე იმპერატორს!"
ცერემონიას 180 ქვეყნიდან, დაახლოებით, 2000 სტუმარო ესწრებოდა.
მოგვიანებით იმპერატორი საზღვარგარეთის სამეფო ოჯახის წარმომადგენლებს ჩაიზე მიიწვევს, ხოლო საღამოს პრემიერმინისტრი აბე მათ ბანკეტზე უმასპინძლებს.
რამდენიმე დღის წინ ცერემონიის გადადებას სტიქიისგან მიყენებული ზარალის გამო აპირებდნენ, რომელსაც 77 ადამიანის სიცოცხლე შეეწირა. დაღუპულათვის პატივის მისაგებად საზეიმო ცერემონია გადაიდო.
ბოლოს ტახტზე ასვლის ცერემონია ცერემონია 29 წლის წინ აკიჰიტოს იმპერატორად კურთხევის დროს გაიმართა.
ნარუჰიტომ იმპერატორობა ოფიციალურად 1-ელ მაისს დაიწყო, რაც იმპერატორის ტიტულის დაუყოვნებლივ გადაცემაზე მიუთითებდა.
იმპერატორ აკიჰიტოს იმპერატორის ტიტულის მიღებიდან თითქმის ორი წლის შემდეგ გამართა ტახტზე ასვლის ფორმალური ცერემონია.
ნარუჰიტო რიგით 126-ე იმპერატორია.
იაპონიის 85 წლის ყოფილი იმპერატორი აკიჰიტო პირველი მონარქია ბოლო 200 წლის განმავლობაში, რომელმაც სიცოცხლეში სამეფო ტახტზე უარი თქვა. იმპერატორმა გულის ოპერაცია გადაიტანა და პროსტატის კიბოს ებრძვის.
იაპონიაში ახალი იმპერატორის ტახტზე ასვლით ახალი წელთაღრიცხვა იწყება, რომელსაც ქვეყანა დასავლურ კალენდართან ერთად იყენებს. იაპონიის ახალ იმპერიულ ეპოქას "რეივას ეპოქა" ერქმევა.
სიტყვა რეივა ორი იეროგლიფისგან შედგება და წესრიგსა და მშვიდობას ან ჰარმონიას გამოხატავს. ყოველი ახალი ეპოქის სახელი ქვეყნის შემდგომი ათწლეულების მისწრაფებას გამოხატავს.
ეს პირველი შემთხვევაა, როდესაც იეროგლიფები ჩინური ტექსტის ნაცვლად მე-8 საუკუნის კლასიკური იაპონური პოემიდან, მანიოშუდან აიღეს. მანიოშუ მდიდარი იაპონური კულტურისა და გრძელი ტრადიციის სიმბოლოა. პრემიერმინისტრ აბეს თქმით, ეპოქა იმედით სავსე იაპონიას გამოხატავს.