საქართველოს ხელისუფლებამ უარი თქვა რუსეთთან დაკავშირებით სანქციების ამოქმედება ეთხოვა აშშ-ისა და ევროკავშირისთვისnews.ru
საქართველომ უარი თქვა რუსეთის წინააღმდეგ დასავლური სანქციების გაძლიერება ეთხოვაizvestia.ru
საქართველოს ხელისუფლებამ რუსეთის წინააღმდეგ ახალ სანქციებზე უარი თქვაlenta.ru
საქართველოს ხელისუფლებამ რუსეთის წინააღმდეგ ახალ სანქციებზე უარი თქვაsovetov.su
საქართველოს ხელისუფლებამ უარი უთხრა ოპოზიციის იდეას რუსეთის წინააღმდეგ დამატებითი სანქციების შესახებRIA NOVOSTI
საქართველოს ხელისუფლებამ რუსეთის წინააღმდეგ სანქციებს მხარი არ დაუჭირაSPUTNIKსაქართველოს ხელისუფლება კვლავ მოექცა რუსული მედიის ყურადღების ქვეშ.
ამჯერად რუსული პროპაგანდისტული მედიის ყურადღება იმ ფაქტმა მიიქცია, რომ მმართველმა გუნდმა ევროპული საქართველოს მიერ მომზადებულ დადგენილების პროექტს მხარი არ დაუჭირა.
"საქართველოს რუსეთის წინააღმდეგ ახალი სანქციების ამოქმედების შეეშინდა" - ასეთია ახალი ამბების ფედერალური სააგენტოს, RIAFAN.RU-ს მიერ მომზადებული მასალის სახელწოდება.
სააგენტო საპარლამენტო უმრავლესობის ლიდერის, გია ვოლსკის, ციტატებს ეყრდნობიან, სადაც ის ამბობს, რომ აშშ ისედაც აკისრებს სანქციებს ყველა იმ ქვეყანას, ვინც საქართველოს ოკუპირებული ტერიტორიებს დამოუკიდებლად აღიარებს და ახალი სანქციების დაწესება საჭირო არ არის.
ვოლსკის ამ ციტატას მასალის ავტორისეული პერიფრაზი მოჰყვება:
"სხვა სიტყვებით რომ ვთქვათ, ქართველ პოლიტიკოსებს რუსეთის წინააღმდეგ სანქციების ამოქმედების, უბრალოდ, შეეშინდათ".
საქართველოს მმართველი გუნდის მიერ ევროპული საქართველოს რეზოლუციისთვის ხმის არმიცემა და მეტიც, მის წინააღმდეგ გალაშქრება, თითქმის არცერთ პროპაგანდისტულ მედიას არ გამორჩენია.
Sputnik, Izvestia, RIA Novosti, Lenta.ru, News.ru, Sovetov.su - ეს იმ პროპაგანდისტული მედიის არასრული ჩამონათვალია, რომლებმაც ამ საკითხს ვრცელი მასალები მიუძღვნეს. ყველა მათგანი თავიანთ მასალაში გია ვოლსკის ციტატებს იყენებდა და მთავარი აქცეენტი სწორედ ის იყო, რომ საქართველოს ხელისუფლებამ უარი თქვა, აშშ-ისთვის რუსეთის მიმართ სანქციების გამკაცრება ეთხოვა.
17 სექტემბერს ევროპასთან ინტეგრაციის კომიტეტმა რუსეთისთვის დამატებითი სანქციების დაწესებაზე ევროპული საქართველოს მომზადებულ დადგენილების პროექტს მხარი არ დაუჭირა. ქართული ოცნების წევრებმა დადგენილების წინააღმდეგ მისცეს ხმა.
მმართველი გუნდის შეფასებით, ევროპული საქართველოს მომზადებული ტექსტი "პროვოკაციულია" და ისინი ამას არ წამოეგებიან. კომიტეტის თავმჯდომარის თამარ ხულორდავას თქმით, "ნებისმიერი ნაბიჯი, რომელიც შეიცავს რისკებს, რომ საქართველოს მოუწევს კიდევ უფრო მეტი ფასის გადახდა რუსეთის აგრესიისთვის", ქართული ოცნებისთვის პრინციპულად მიუღებელია.
ევროპული საქართველო საქართველოს მთავრობას სთხოვს, უზრუნველყოს, რომ ევროკავშირმა და აშშ-მ შემოიღონ სანქციები ყველა კომპანიის მიმართ, რომლებიც ეკონომიკურ საქმიანობას, მაგალითად, ეთნიკური წმენდის მსხვერპლთა ქონების გაქირავებას, წარმართავენ საქართველოს ოკუპირებულ ტერიტორიებზე.
ამის შესახებ პარტიის წევრების, სერგი კაპანაძის და გიორგი კანდელაკის მიერ მომზადებული დადგენილების პროექტში წერია. პარტია ითხოვს, საქართველოს მთავრობამ მიიღოს ყველა ზომა და ჩაატაროს აუცილებელი დიპლომატიური და პოლიტიკური სამუშაო, რათა უზრუნველყოს:
- საქართველოს ოკუპირებული ტერიტორიებიდან საოკუპაციო ძალების გაყვანა და 2008 წლის ევროკავშირის შუამდგომლობით მიღწეული ცეცხლის შეწყვეტის შესახებ ხელშეკრულების შესრულების მოთხოვნა შევიდეს ევროკავშირისა და აშშ-ს მიერ რუსეთის ფედერაციაზე დაკისრებული სხვადასხვა სანქციების მოთხოვნებში;
- ევროპის კავშირის და აშშ-ს მიერ რუსეთის ფედერაციაზე დაწესებული შესაბამისი პერსონალური სანქციების პაკეტებში ასევე შევიდეს ოთხოზორია-ტატუნაშვილის სია;
- ევროპის კავშირმა და აშშ-მ შემოიღონ სანქციები ყველა კომპანიის მიმართ, რომლებიც ეკონომიკურ საქმიანობას, მაგალითად, ეთნიკური წმენდის მსხვერპლთა ქონების გაქირავებას, წარმართავენ საქართველოს ოკუპირებულ ტერიტორიებზე.
დადგენილების პროექტში წერია, რომ აუცილებელია, მთავრობამ შეასრულოს ეს სამი მოთხოვნა, ვინაიდან:
- რუსეთის ფედერაცია აგრძელებს საქართველოს ტერიტორიების 20 პროცენტის - აფხაზეთისა და ცხინვალის რეგიონის უკანონო სამხედრო ოკუპაციას;
- ვინაიდან რუსეთის ფედერაცია უარს აცხადებს შეასრულოს ევროკავშირის შუამდგომლობით მიღწეული ცეცხლის შეწყვეტის შესახებ ხელშეკრულება; კერძოდ, უკან დახიოს საკუთარი შეიარაღებული ძალები ომამდელ პოზიციებზე და დაუშვას ევროკავშირის სადამკვირვებლო მისია საკუთარი მანდატით განსაზღვრულ არეალში - საქართველოს მთელ ტერიტორიაზე;
- ვინაიდან რუსეთის ფედერაცია კვლავაც გამოირჩევა დესტრუქციული მიდგომით ჟენევის მოლაპარაკებებზე, განსაკუთრებით საერთაშორისო უსაფრთხოების მექანიზმებისა და ეთნიკური წმენდის შედეგების აღმოფხვრის საკითხებზე;
- ვინაიდან საქართველოს ოკუპირებულ ტერიტორიებზე რუსეთის ფედერაციის მიერ განხორციელებული საერთაშორისოდ აღიარებული ეთნიკური წმენდის შედეგების აღმოფხვრა - დევნილთა ღირსეული და უსაფრთხო დაბრუნება და მათი საკუთრების უფლებების აღდგენა - და, ასევე, სრული დეოკუპაცია საქართველოს სახელმწიფოს უმთავრესი პრიორიტეტებია;
- ვინაიდან ეთნიკური წმენდის შედეგების ნებისმიერი ფორმით ლეგიტიმაცია და განმტკიცება - მათ შორის ეთნიკური წმენდის მსხვერპლთათვის წართმეული უძრავი ქონების დასავლური კომპანიების მიერ გაქირავება - საქართველოს სახელმწიფოსთვის კატეგორიულად მიუღებელია".
