საქართველოს თავდაცვის სამინისტროს ინფორმაციით, უწყებაში აქტიურ რეზერვში ჩარიცხვის მსურველთა რეგისტრაცია დაიწყო. რეზერვის პროგრამაში ჩარიცხვის შესაძლებლობა თბილისის, მცხეთისა და იმერეთის რეგიონში მცხოვრები 18-დან 50 წლამდე ასაკის მოქალაქეებს აქვთ. სამინისტროს განმარტებით, ისინი სამუშაო ადგილს შეინარჩუნებენ და პარალელურად დამატებით ანაზღაურებას მიიღებენ.
პროგრამაში მონაწილეობა შეუძლიათ აღნიშნულ თბილისში, მცხეთასა და იმერეთის რეგიონში მცხოვრებ 18-დან 22 წლის ჩათვლით სტუდენტებსაც, რომლებსაც სარეზერვო სამსახურის ერთი კონტრაქტის ვადის დასრულების შემდეგ სავალდებულო სამსახური მოხდილად ჩაეთვლებათ.
"ტერიტორიული რეზერვის პროგრამაში ჩარიცხვის შემთხვევაში რეზერვისტს სამუშაო ადგილი უნარჩუნდება და სამსახურის პერიოდი შრომის საერთო სტაჟში ჩაეთვლება. რეზერვში ჩარიცხულ მოქალაქეებს 5-წლიანი კონტრაქტი გაუფორმდებათ და მათი შრომის ანაზღაურება ყოველთვიურად წოდებრივი სარგოს 20%-ს შეადგენს. საერთო ჯამში, სამხედრო სამსახურის პერიოდში რეზერვისტის წლიური მინიმალური ანაზღაურება ხელზე ასაღები 2700 ლარია. საბრძოლო მომზადება წლის განმავლობაში 45 დღეზეა გათვლილი, რომელიც 12 თვეზე ნაწილდება", - ამბობენ თავდაცვის სამინისტროში.
მათივე ინფორმაციით, რეზერვში ჩარიცხვის მსურველთა საბუთები მიიღება 1 ივლისიდან 1 სექტემბრის ჩათვლით, ყოველ სამუშაო დღეს, დილის 10-დან საღამოს 4 საათამდე.
