"თუკი მსგავსი რამ არსებობს, რა თქმა უნდა, ეს არის ძალიან სერიოზული ბრალდება და, რა თქმა უნდა, მექნება რეაგირება" - ამის შესახებ სახალხო დამცველმა ნინო ლომჯარიამ თიბისი ბანკის დამფუძნებლის მამუკა ხაზარაძის გავრცელებულ ინფორმაციაზე თქვა. ცნობისთვის, პარლამენტის საბიუჯეტო-საფინანსო კომიტეტის სხდომაზე სიტყვით გამოსვლისას მამუკა ხაზარაძემ აღნიშნა, რომ 2018 წლის საპრეზიდენტო არჩევნების მეორე ტურის წინ მას შინაგან საქმეთა მინისტრმა გიორგი გახარიამ მუქარის წერილი გაუგზავნა.
"რაც მოვისმინე, როგორც მათთან შეხვედრის დროს, ასევე გუშინ საპარლამენტო საკომიტეტო განხილვაზე ნამდვილად არის ის საკითხები, რაც ექცევა ადამიანის უფლებების დაცვის ქვეშ. წერილთან დაკავშირებით, თუკი მსგავსი რამ არსებობს, რა თქმა უნდა, ეს არის ძალიან სერიოზული ბრალდება და, რა თქმა უნდა, მექნება რეაგირება, არ ვიცი, ეს იქნება პირადი შეხვედრის ფორმით, თუ სხვა ფორმით.
რა თქმა უნდა, ეს არის ძალიან მძიმე ბრალდება და თუკი დადასტურდა, ამაზე ძალიან სერიოზული რეაგირება არის საჭირო არა მარტო სახალხო დამცველის, არამედ სამართალდამცავი ორგანოების მხრიდანაც" - თქვა ნინო ლომჯარიამ.
თიბისი ბანკის დამფუძნებელმა მამუკა ხაზარაძემ შს მინისტრის მუქარაზე 4 მარტს ისაუბრა. მისი ინფორმაციით, გიორგი გახარიას წერილში ეწერა, რომ "რაღაცის შეუსრულებლობის" შემთხვევაში, ხაზარაძე და ბანკი რეპუტაციული ზიანის წინაშე დადგებოდნენ. თიბისი ბანკის დამფუძნებელმა ასევე აღნიშნა, რომ წერილის შესახებ თავის დაკითხვის ოქმშიც ისაუბრა, თუმცა სამი პროკურორიდან არცერთს მისთვის ამის შესახებ კითხვა არ დაუსვამს. მოგვიანებით განცხადება გაავრცელა თავად პროკურატურამაც, რომელშიც უწყება წერს, რომ ხაზარაძე ლაპარაკობდა მუქარის წერილზე, თუმცა, მას გიორგი გახარია არ უხსენებია.
შს მინისტრმა გიორგი გახარიამ მამუკა ხაზარაძის ნათქვამს ტყუილი უწოდა და თქვა, რომ "ის წერილებს არ წერს, სათქმელს პირდაპირ და პირში ეუბნება ყველას".
5 მარტს 14:00 საათზე თბილისის საქალაქო სასამართლოში TBC ბანკის დამფუძნებელ მამუკა ხაზარაძეს დაკითხავენ. პროკურატურის ცნობით, ხაზარაძის სურვილი იყო, მოსამართლის წინაშე დაეკითხათ.
