2019 წლის 31 მარტიდან პარიზიდან თბილისის მიმართულებით რეგულარული რეისების შესრულებას საფრანგეთის სახელმწიფო ავიაკომპანია Air France იწყებს.
პარიზის შარლ დე გოლის აეროპორტიდან თბილისის მიმართულებით რეისები კვირაში ორჯერ - ოთხშაბათსა და კვირას შესრულდება. თვითმფრინავი პარიზის დროით 13:25-ზე გამოფრინდება და თბილისში 20:10 საათზე იქნება. ხოლო თბილისიდან რეისი შესრულდება 9:00-ზე და პარიზში იქაური დროით 12:10-ზე ჩავა. მგზავრობის ხანგრძლივობა 4 საათი და 45 წუთია.
Air France ევროპის ერთ-ერთი უძველესი ავიაკომპანიაა, რომელიც 1933 წელს დაარსდა. 2004 წელს, ნიდერლანდების KLM-ის ავიახაზებთან გაერთიანების შემდეგ, Air France-KLM ევროპის მე-4 უდიდეს ავიაკომპანიად იქცა. ავიახაზებს ყოველწლიურად 77 მილიონზე მეტი მგზავრი 243 მიმართულებით, 103 ქვეყანაში გადაჰყავს.