კეით დინოტა შვიდი წლის იყო, როცა დედამ პირველად ნაცრისფერი თმა უპოვა. 14 წლისთვის, მას უკვე მტკიცედ ჰქონდა გადაწყვეტილი, რომ თმის შეღებვა დაეწყო. 28 წლის იყო, როცა მას სალონის სავარძელში უკვე 1 000 საათი ჰქონდა გატარებული და 18 000 დოლარი - დახარჯული. მან სწორედ ამ დროს გადაწყვიტა, რომ ურჩევნია, მიიღოს და დაფასოს თავისი ბუნებრივი თმა.
ის ერთ-ერთია ასობით ქალიდან, რომლებიც ინსტაგრამის ანგარიშზე - Grombre - არიან პოპულარულები. ქალების საზოგადოება, რომელიც უარს ეუბნება თმის საღებავებს.
ინსტაგრამის ანგარიშზე ეს ქალები ერთმანეთს შთაბეჭდილებებს უზიარებენ. მას 10 000 მიმდევარი და ძალიან ბევრი გამამხნევებელი კომენტარი აქვს.
ქეითი, რომელიც ნიუ-იორკში ცხოვრობს, ამბობს, რომ ამ გადაწყვეტილების მიმართ ხალხი სკეპტიკური იყო. "ხალხი მეკითხებოდა - დარწმუნებული ხარ? კარიერისთვის ცუდი არ იქნება?ჯერ ახალგაზრდა რომ ხარ? ეს სისულელეა." ის ფიქრობს, რომ ნაცრისფერთმიანი ქალები უფრო მეტად უნდა იყვნენ წარმოდგენილები საზოგადოებაში.
აღსანიშნავია, რომ მაშინ, როცა არსებობს საზოგადოებრივი წნეხი, რომელიც მიგითითებს, რომ უნდა გამოიყურებოდე ახალგაზრდულად, შეღებილი ნაცრისფერი თმა საკმაოდ მასშტაბური მოდის ტრენდი გახდა. ცნობილი ადამიანები, როგორებიცაა ლედი გაგა, ბიონსე და მერაია ქერი, ხშირად იღებავენ თმას ვერცხლისფრად. სილამაზის სალონებში წელს განსაკუთრებით დიდი მოთხოვნაა ვერცხლისფერ თუ ნაცრისფერ, ისევე როგორც ვარდისფერ თმაზე. ამ ტრენდმა არაერთი ქალი დაარწმუნა, რომ ბუნებრივი თმის შეღებვა უნდა შეეწყვიტა.
თმის საღებავს ეგვიპტესა და რომშიც იყენებდნენ, მაგრამ თანამედროვე ეპოქაში ის მეოცე საუკუნეში გაჩნდა. თმის შეღებვა არ მიიჩნეოდა ისეთ ქცევად, რომელიც პატიოსან ქალს შეეფერება, რადგან ის უბიწო სილამაზის იდეის საწინააღმდეგო მნიშვნელობას ატარებდა.
ეს შეიცვალა მაშინ, როცა გაჩნდა ისეთი ბრენდები, როგორებიცაა ლორეალი და კლაიროლი. მათი კომერციული საღებავები მხოლოდ იმ ქალებზე იყო გათვლილი, რომლებსაც ახალგაზრდულობის შენარჩუნება უნდოდათ. რამდენიმე ათწლეულში იგივე დაიწყეს კაცებზე ორიენტირებულმა ბრენდებმა.
ბრედფორდის უნივერსიტეტის პროფესორი დესმონდ ტობინი, რომელიც თმის და კანის პიგმენტაციას შეისწავლის, ამბობს, რომ ევროპელებისთვის 20 წლის ასაკში შეჭაღარავება სავსებით ნორმალურია.
მან მონაწილეობა მიიღო ერთ-ერთ კვლევაში, რომელშიც თმის სხვადასხვა თვისებებზე პასუხისმგებელი გენები შეისწავლეს. აღმოჩნდა, რომ აფრიკული და აზიური წარმოშობის ადამიანები უფრო გვიან ჭაღარავდებიან. თმის ფოლიკულის ჩამოყალიბების პროცესზე ბევრი რამ ახდენს გავლენას, მაგრამ ზოგიერთ ადამიანი პიგმენტის დაკარგვისკენ და გამელოტებისკენ უფრო მეტადაა წინასწარგანწყობილი.