არჩილ ტატუნაშვილის საქმე

მკვლელობიდან 26 დღის შემდეგ არჩილ ტატუნაშვილის ცხედარი გადმოასვენეს

რადიო თავისუფლება

მკვლელობიდან 26 დღის შემდეგ არჩილ ტატუნაშვილის ცხედარი ოჯახს დაუბრუნეს. ის საქართველოს კონტროლირებად ტერიტორიაზე ერგნეთის საგუშაგოდან, წითელი ჯვრის დახმარებით გადმოასვენეს. 

წითელი ჯვრის მეშვეობით, საქართველოს კონტროლირებად ტერიტორიაზე დაბრუნდა ის მანქანა, რომლის მეშვეობითაც ტატუნაშვილი ახალგორში გადადიოდა. 

აქ იმყოფებოდნენ სახელმწიფო მინისტრი სამოქალაქო თანასწორობის და შერიგების საკითხებში, ქეთევან ციხელაშვილი, ასევე სუს-ის ანალიტიკური დეპარტამენტის უფროსის მოადგილე, კახა ქემოკლიძე და დევნილთა განსახლების მინისტრი, სოზარ სუბარი, ასევე მისი მოადგილე მამუკა ცოტნიაშვილი. 

ერგნეთში გაემგზავრა საქართველოს სახალხო დამცველიც. 

ინფორმაცია, რომ არჩილ ტატუნაშვილის ცხედარს საქართველოს კონტროლირებად ტერიტორიაზე დღეს გადმოასვენებდნენ, ოკუპირებული ცხინვალის ე.წ მთავრობის საინფორმაციო სააგენტომ რამდენიმე საათის გაავრცელა. 

მათი ცნობით, ცხედართან ერთად საქართველოს მთავრობას ექსპერტიზის დასკვნის შედეგებს გადმოსცემენ, რომელიც ტატუნაშვილის ცხედარს რუსეთში ჩაუტარდა. 

ახალგორიდან დევნილი, სოფელ წილკანში მცხოვრები არჩილ ტატუნაშვილი 2018 წლის 22 თებერვალს ლევან ქუტაშვილთან და იოსებ პავლიაშვილთან ერთად ოკუპირებული რეჟიმის წარმომადგენლებმა დააკავეს. მომდევნო დღეს ტატუნაშვილი ოკუპირებულ ქალაქ ცხინვალის საავადმყოფოში გარდაიცვალა. სუს-ის ცნობით, მას ცხინვალის საპატიმროში გადაყვანისას სცემეს. საქართველოს სახალხო დამცველმა კი თქვა, რომ ტატუნაშვილი ციხეში უკვე გარდაცვლილი მიიყვანეს.

რაც შეეხება ლევან ქუტაშვილს და იოსებ პავლიაშვილს, ისინი ცხინვალის ე.წ ციხიდან გათავისუფლებულების შემდეგ, რამდენიმე დღე საქართველოს მიერ კონტროლირებად ტერიტორიაზე დაბრუნებას ვერ ახერხებდნენ. 

კომენტარები