თბილისის მერიამ ტროტუარებზე ავტომანქანების პარკირების 101 ადგილი გააუქმა. მერია მიზეზად "ქვეითების უსაფრთხო და კომფორტულ გადაადგილებას" ასახელებს.
ტროტუარებზე ავტომანქანების პარკირების ყველაზე მეტი ადგილი შემცირდა: გრიგოლ რობაქიძის გამზირის კორპუს 2ა-2ბ-სთან - 21 ერთეული და ვაჟა-ფშაველას გამზირის N30-ის მიმდებარედ - 23. მერიის ცნობით, სულ ვაჟა-ფშაველას გამზირზე არსებულ ტროტუარებზე ავტომანქანების დგომის 65 ადგილი შეიზღუდა. ასევე, ჭავჭავაძის N37-თან ტროტუარებზე პარკირების 12 ადგილი გაუქმდა. მსგავსი ცვლილებები შეეხო ყაზბეგის გამზირის N9ა-ში არსებულ პარკირების სამ ადგილსაც.
"ამასთანავე, დედაქალაქის სხვადასხვა უბანში, ავტომობილების 186 სადგომი ადგილი დაემატა, მათ შორის, რიყის ტერიტორიაზე -105, წინანდლის ქუჩაზე - 30, ხოლო ვირსალაძისა და ხიდის ქუჩებზე, სადაც ამჟამად, მასშტაბური სარეკონსტრუქციო სამუშაოები მიმდინარეობს, ჯამში 40 ადგილი. მითითებულ მისამართებზე პარკირების ადგილებს შშმ პირთათვის გამოვყოფთ" - აცხადებს მერია.
დედაქალაქის მთავრობა ტროტუარებზე პარკირებას ეტაპობრივად აუქმებს. თბილისის მერიის მტკიცებით, 2014 წელს ქვეითთა სავალ ზოლზე არსებული 2 200 ადგილიდან დღეისთვის, სულ 924-ია დარჩენილი.
