საქართველოს სავალუტო რეზერვების მოცულობა 2013 წლის დონეს დაუბრუნდა, ამის შესახებ ეროვნული ბანკის მიერ გამოქვეყნებული სტატისტიკიდან ხდება ცნობილი. ივნისის მდგომარეობით სავალუტო რეზერვების მოცულობა $2.75 მილიარდია, რაც მაისის მაჩვენებელს $129 მილიონით, იანვრის მაჩვენებელს კი $151 მილიონით აღემატება.
სავალურო რეზერვების მსგავსი მაჩვენებელი საქართველოს 2013 წლის დეკემბრის შემდეგ არ ჰქონია, რადგანაც ქვეყანაში არსებული სავალუტო კრიზისის გამო სებ-ს გარკვეული მოცულობის რეზერვების გაყიდვა მოუწიდა. წელს ეროვნულმა ბანკმა სავალუტო აუქციონზე დაახლოებით $89 მილიონი შეისყიდა.
ეს მაჩვენებელი რეზერვების მოცულობის პიკურ პერიოდს - 2013 წლის ოქტომბერს 5%-ით ჩამოუვარდება, მაშინ სავალუტო რეზერვები დაახლოებით $2.9 მილიარდს შეადგენდა.
2014 წელს ეროვნულმა ბანკმა $300 მილიონი გაყიდა და $200 მილიონი შეისყიდა. 2015-ში სებ-მა $286 მილიონი დოლარი გაყიდა, ამ წელს ლარის მკვეთრი გაუფასურების გამო ეროვნულ ბანკს რეზერვები არ შეუსყიდია. 2016 წელს კი სებ-მა სავალუქტო აუქციონზე $280 მილიონი დოლარი გაყიდა და $278 მილიონი შეისყიდა.
საერთაშორისო სავალუტო ფონდის (IMF) კლასიფიკაციით, ქვეყნების სავალუტო რეზერვები მათი სამი თვის იმპორტის მაჩვენებლებზე ნაკლები არ უნდა იყოს, რაც საქართველოს შემთხვევაში დაახლოებით $1.8 მილიარდია (ივნისი, მაისი, აპრილი)