გუშინ, ჩემპიონთა ლიგის მეოთხედფინალში დორტმუნდის ბორუსია ფრანგულ მონაკოს უნდა დაპირისპირებოდა, თუმცა თამაშის დაწყებამდე 45 წუთით ადრე აფეთქება მოხდა და თამაში არ ჩატარდა. UEFA-ს გადაწყვეტილებით, თამაში დღეს, თბილისის დროით 20:45 საათზე გაიმართება.
შესაბამისად, გუშინ მონაკოდან საკუთარი გუნდის მხარდასაჭერად ჩასულ გულშემატკივრებს დორტმუნდში დარჩენა მოუწიათ.
დორტმუნდის ბორუსიას გულშემატკივრები ამ ამბავს გულისხმიერად შეხვდნენ და მონაკოს იმ ფანებს, რომლებიც მატჩის შემდეგ ქალაქის დატოვებას აპირებდნენ, ღამის გასათევი ადგილები შესთავაზეს.
Twitter-ზე გავრცელებული ჰეშთეგით #BedForAwayFans დორტმუნდის ბორუსიას არაერთმა გულშემატკივარმა გამოთქვა მზადყოფნა, რომ ქალაქში დარჩენილი სტუმრებისთვის ღამის გასათევი ადგილი გამოეყო.
სოციალურ ქსელებში არაერთი ფოტო გავრცელდა სადაც ჩანს, რომ გერმანელებმა მონაკოს გულშემატკივრებს გულთბილად უმასპინძლეს.