საზოგადოებრივი მაუწყებლის სტრატეგიული მართვის ცენტრის დირექტორის თანამდებობას მწერალი პაატა ქურდაძე დაიკავებს. ამის შესახებ საზოგადოებრივი მაუწყებლის გენერალურმა დირექტორმა დღევანდელ პრესკონფერენციაზე განაცხადა. ვასილ მაღლაფერიძის თქმით, „საზოგადოებრივი მაუწყებლის რეფორმაზე - 2017-2019 გარდაქმნისა და განვითარების სამწლიანი სამოქმედო გეგმა“ - მისმა გუნდმა იმუშავა, რომელსაც ქურდაძეც დაემატა.
"ორი-სამი დღის წინ, პაატა ქურდაძემ გვითხრა საბოლოო თანხმობა და ის არის ერთ-ერთი თანაავტორი ამ გეგმისა. პაატა ქურდაძე დაიკავებს სტრატეგიული მართვის ცენტრის დირექტორის თანამდებობას“, - განაცხადა მაღლაფერიძემ.
საზოგადოებრივი მაუწყებლის გენერალურმა დირექტორმა ვასილ მაღლაფერიძემ GPB-ის გარდაქმნისა და განვითარების სამწლიანი სამოქმედო გეგმა დღეს წარმოადგინა. მისი თქმით, "თუ საზოგადოების თანხმობა იქნება, ვგეგმავთ მაუწყებლის ყველა პლატფორმაზე ყველა გადაცემის და წარმოების შეჩერებას (საინფორმაციო გამოშვებების გარდა), თანამშრომლების რაოდენობის ოპტიმიზაციას; გამოთავისუფლებული თანხების მიმართვას მატერიალურ-ტექნიკური და ტექნოლოგიური ბაზის გასაახლებლად; მაუწყებლის ყველა სეგმენტში კონკურენციის პრინციპზე გადასვლას".
