საფრანგეთის პრეზიდენტობის რესპუბლიკელმა კანდიდატმა ფრანსუა ფიიონმა, ფრანგულ გამოცემა Le Monde-თან ინტერვიუში აღნიშნა, რომ საქართველო და უკრაინა NATO-სა და ევროკავშირის წევრობას არ იმსახურებენ.
ფიოონის თქმით, იმ პოლიტიკოსების განცხადებები, რომლებსაც საქართველოსა და უკრაინის NATO-ში გაწევრიანება სურთ, უპასუხისმგებლოა.
"თქვენ უბრალოდ უნდა აღიაროთ, რომ უკრაინა და საქართველო არ არიან მზად ევროკავშირსა ან NATO-ში შესასვლელად", - თქვა ფიიონმა.
ფიოონის თქმით, რუსეთთან ურთიერთობა ევროპის მომავლისთვის სტრატეგიული საკითხია და ის უნდა აღდგეს.
"რუსეთი არის ქვეყანა დემოკრატიული ტრადიციების გარეშე. ქვეყანა, რომელსაც აქვს ბირთვული იარაღი. არსებობს ორი გზა: ჩვენ ან ვცდილობთ რუსეთთან შეთანხმების მიღწევას, ან ვეწინააღმდეგებით. ვის შეიძლება სურდეს რუსეთთან კონფლიქტი?", - თქვა ფიიონმა.
ფიიონის თქმით, დასავლეთმა რუსეთთან მიმართებით ბევრი შეცდომა დაუშვა და აუცილებელია, ევროპამ სცადოს რუსეთის შესაბამის ადგილზე დაბრუნება.
ფიიონის აზრით, აშშ-ის პოლიტიკა, რომელიც განაპირობებს NATO-ს პოლიტიკასაც, არ არის ეფექტური ისლამური ტოტალიტარიზმის წინააღმდეგ. მისი აზრით, უნდა შეიქმნას ევროპული თავდაცვის ალიანსიც.
"აშშ-მ დაუშვა შეცდომები შუა აღმოსავლეთში. ისინი ნაწილობრივ არიან პასუხისმგებლები იქ შექმნილ სიტუაციაზე. არ აქვს მნიშვნელობა, იქნება თუ არა ტრამპი, ევროპამ აუცილებლად უნდა შექმნას საკუთარი თავდაცვის ალიანსი", - აღნიშნა ფიიონმა.
საფრანგეთის საპრეზიდენტო არჩევნების პირველი ტური 23 აპრილს გაიმართება, სადაც სამი მთავარი კანდიდატი - ფრანსუა ფიიონი, მარინ ლე პენი და ამონსა და ვალსს შორის გამარჯვებული - იქნება.
