საფრანგეთის ქალაქ კალეს პრეფექტის ცნობით, ოპერაციის დაწყებიდან მესამე დღეს ქალაქ კალეს ჯუნგლებად წოდებული მიგრანტების ბანაკი ცარიელია.
"ბანაკში მიგრანტები აღარ არიან, ჩვენი მისია შესრულებულია", - თქვა კალეს პრეფექტმა.
გავრცელებული ცნობებით, ოპერაციის პირველმა დღემ მშვიდობიანად ჩაიარა და ბანაკი 2318-მა მიგრანტმა დატოვა. მეორე დღეს ადგილი ჰქონდა მცირე დაპირისპირებებს, მესამე დღეს კი, 4 მიგრანტი ბანაკის რამდენიმე ადგილას დიდი ხანძრის გაჩენის გამო დააკავეს.
მიგრანტები გადაიყვანეს საფრანგეთის თავშესაფრებში. საფრანგეთის მთავრობა დიდ ბრიტანეთს მიგრანტების ნაწილის მიღებას სთხოვს, ხოლო 1000-ზე მეტი თანმხლები ზრდასრული ადამიანის გარეშე მყოფი არასრულწლოვანის ბედი ჯერ კიდევ გაურკვეველია.
საფრანგეთის ქალაქ კალეს ბანაკი, სადაც 6000-8000 მიგრანტი ცხოვრობდა და ცდილობდა ამ ბანაკიდან ბრიტანეთში შეეღწია, ევროპის მიგრანტთა კრიზისის სიმბოლოდ იქცა.