საქართველოს ბანკების ასოციაციამ და საქართველოს ბიზნესასოციაციამ საპოლიციო გამოსახლების გაუქმება საკონსტიტუციო სასამართლოში გაასაჩივრეს. ასოციაციებში ფიქრობენ, რომ საპოლიციო გამოსახლების გაუქმება ანტიკონსტიტუციური გადაწყვეტილება იყო და მან ბიზნესს მნიშვნელოვანი ზიანი მიაყენა. სარჩელი ერთ-ერთი მოქალაქის საქმეს ეხება, რომელსაც ამ ნორმის გამო მესაკუთრის უფლებები შეეზღუდა.
საკონსტიტუციო სასამართლოში ბიზნესასოციაციების ინტერესთა წარმომადგენელმა ლევან ალაფიშვილმა ბიზნესკონტაქტთან საუბარში განაცხადა, რომ პარლამენტის მიერ დამტკიცებული კანონის გამო უკვე იზარალა ფიზიკურმა პირმა გ. ნ-მ, რომელიც ორ ბიზნესგაერთიანებასთან ერთად საკონსტიტუციო სასამართლოში ერთ-ერთი მოსარჩელეა.
საპოლიციო გამოსახლების გამაუქმებელ კანონპროექტს პრეზიდენტმა ხელი 2015 წლის 29 დეკემბერს მოაწერა. კანონის ავტორის, ქართული ოცნების დეპუტატის პაატა კიკნაველიძის შეფასებით, კანონი ქვეყანაში საკუთრების უფლების დაცულობას ზრდის, რადგანაც მის შედეგად საპოლიციო გამოსახლება სასამართლო გამოსახლების ნორმებით იცვლება.
აქამდე მოქმედი ნორმის მიხედვით, მესაკუთრეს მისი კუთვნილი უძრავი ნივთის მფლობელის (რომელსაც მფლობელობის უფლების დამდგენი წერილობითი საბუთი არ გააჩნია) გამოსახლების მოთხოვნით შეეძლო პოლიციისთვის მიემართა, ამ ნორმის გაუქმების შედეგად კი, მესაკუთრეს იმავე შედეგის მისაღწევად სასამართლოს გადაწყვეტილება ესაჭიროება.
