ჩერგოლეიშვილი დაშლილ კოალიციაზე: ივანიშვილს ლეღვის ფოთლები მობეზრდა და მოიშორა

შინაარსის თვალსაზრისით არ მიმაჩნია, რომ რამე შეიცვალა, უბრალოდ ბიძინა ივანიშვილს მობეზრდა ეს ლეღვის ფოთლები და ჩამოიშორა. თავის დროზე მობეზრდა ალასანია, ახლა მობეზრდა რესპუბლიკელები, ესენი ჩამოიშორა. სჭირდება თავისი და ნაღდი ხალხი, იმიტომ, რომ იცის, რომ იცვლება ვითარება, პრობლემური არჩევნები ექნება, უფრო მძიმე ბრძოლა მოუწევს, პარლამენტში რა მოხდება, როგორ მოხდება, ვერ ხვდება, არ იცის. ამიტომაც უნდა, რომ იქ ჰყავდეს ნაღდად თავისი ხალხი, ესენი არიან - მეჭიაური, ვოლსკი, კობახიძე, ბესელია და ის თავისი ექსპერიმენტული ბაჭიები რომ გამოზარდა 2030-ში, ხომ აქვს ეს ამბიცია, რომ ახალი საზოგადოება უნდა შექმნას და ალბათ ეს ხალხი - კალანდაძე, დუნდუა, კიდევ იქ რობოტივით ხალხი რომ ჰყავს, რომელიც აქებს ხოლმე მუდმივად, ალბათ ესენი ეყოლება. ხოლო რესპუბლიკელები პრეტენზიების მქონე ხალხია, ანუ რესპუბლიკელების მსოფლმხედველობას ხომ არ გაუღიზიანებია ის, რესპუბლიკელების ამბიციებმა გააღიზიანა. რეალურად ყველაფერი წავა ისე, როგორც თავიდან მიდიოდა - ჩვენ ნაბიჯ-ნაბიჯ დავშორდებით დასავლეთს. ამას ვაკეთებდით, აქამდეც ეს ხდებოდა. უბრალოდ ახლა გახდა აშკარა, ახლა შირმისთვისაც აღარ სჭირდება რესპუბლიკელები.