ბათუმის პორტში NATO-ს მუდმივმოქმედი ნაღმსაწინააღმდეგო შენაერთი (SNMCMG2) შემოვიდა, რომელიც ალიანსის სხვადასხვა წევრი ქვეყნის დროშის ქვეშ მცურავი ოთხი ხომალდითაა დაკომპლექტებული.
NATO-ს ხომალდები ბათუმის ნავსადგურში 15 თებერვლამდე გაჩერდებიან და ქართული მხარის მიერ ორგანიზებულ სხვადასხვა ერთობლივ სწავლებასა და საჩვენებელ წვრთნებში მიიღებენ მონაწილეობას.
აღნიშნული სწავლებები NATO-სა და შსს-ს საზღვაო პოლიციის სანაპირო დაცვის ხომალდების ურთიერთქმედებასა და ურთიერთთავსებადობის ამაღლებას ისახავს მიზნად.
ხვალ ბათუმში ოფიციალური ვიზიტით ჩამოვა NATO-ს გაერთიანებული საზღვაო ძალების სარდლობის შტაბის უფროსი კონტრადმირალი ჯორჯო ლაციო, რომელიც შს მინისტრ გიორგი მღებრიშვილს შეხვდება.
