ბრიტანეთში ცნობილი სთრით არტისტის, BANKSY-ს ყველაზე მასშტაბური გამოფენა, Dismaland გაიხსნა. პარკი, რომელიც მხიარული და ზღაპრული დისნეილენდის საპირწონედ, სოციალური და პოლიტიკური თემატიკით არის დატვირთული, დამთვალიერებელს სთავაზობს "მსოფლიოს ილუზიებისა და მშვენიერების" გარეშე. მრავალი ინსტალაციისგან შემდგარ, დამთრგუნველ სივრცეში (dismal - დამთრგუნველი, პირქუში), სადაც ბავშვები არ დაიშვებიან, სხვა მრავალი თანამედროვე არტისტის, მაგალითად დემიენ ჰირსტის ნამუშევრებიც გამოიფინა. როგორც პროექტის პრესრელიზშია აღნიშნული "ეს არის პირველ რიგში თანამედროვე ხელოვნების, გართობისა და მსუბუქი ანარქიის ფესტივალი". თავად ავტორის თქმით, Dismaland არის ადგილი, სადაც შეგიძლია გაექცე ილუზიებით სავსე სამყაროს, თუმცა, არა ბავშვებთან ერთად.
