საქართველოს ფინანსთა სამინისტროს საგამოძიებო სამსახურმა თაღლითობის ბრალდებით შპს აუდიტორული კომპანია კონსალტინგ ჯორჯიას დირექტორი სიმონ ჭელიძე და მოქალაქე რობიზონ ონიანი დააკავა.
"ბრალდებულებმა ერთ-ერთი მეწარმე სუბიექტი მოტყუებით დაარწმუნეს, რომ პირადი კავშირების გამოყენების გზით, თითქოსდა ახლო მეგობრების მეშვეობით, რომლებიც საქართველოს ფინანსთა სამინისტროში იკავებდნენ სხვადასხვა წამყვან თანამდებობებს, დაეხმარებოდნენ სახელმწიფო ბიუჯეტის წინაშე არსებული დავალიანების - 2 435 159 ლარის საგადასახადო შეთანხმების გაფორმების გზით, 200 000 ლარამდე შემცირებაში, რის სანაცვლოდაც მოტყუებით, თაღლითურად გამოართვეს 100 000 ლარი", - აცხადებს საგამოძიებო სამსახური.
საქმეზე გამოძიება გრძელდება საქართველოს სისხლის სამართლის კოდექსის 180-ე მუხლის მე-2 ნაწილით, რაც ითვალისწინებს თავისუფლების აღკვეთას ექვსიდან ცხრა წლამდე.
