დევნილთა საცხოვრებელი კორპუსების მშენებლობისთვის გამოყოფილი თანხის უკანონოდ დაუფლების, სამსახურებრივი უფლებამოსილების ბოროტად გამოყენებისა და სამსახურებრივი გულგრილობის ფაქტზე საქართველოს ფინანსთა სამინისტროს საგამოძიებო სამსახურმა დევნილთა სამინისტროს სამ ყოფილ თანამშრომელს: თეიმურაზ მაღალდაძეს, რატი სვანიძეს და ამირან გოგიძეს, ასევე სამშენებლო კომპანია NBG-ის დირექტორებს ნუგზარ ენდელაძეს და ალექსანდრე ხურციძეს ბრალი წარუდგინა.
საქმე ეხება დევნილთა სამინისტროში დავით დარახველიძის მინისტრობის პერიოდში ჩადენილ შესაძლო დანაშაულს. ფინანსთა სამინისტროს საგამოძიებო სამსახურის ინფორმაციით, NBG-ის ხელმძღვანელები ლტოლვილთათვის ორი ხუთსართულიანი საცხოვრებელი კორპუსის მშენებლობის პროცესში, უკანონოდ დაეუფლნენ ლტოლვილთა სამინისტროს მიერ გამოყოფილი თანხის ნაწილს - 1 081 611 ლარს. გამოძიების ვერსიით, სამინისტროს ყოფილმა თანამშრომლებმა ხელმოწერით ყალბი აქტები დაადასტურეს და არ მოითხოვეს ხელშეკრულების შესრულების საბანკო გარანტია - 211 200 ლარი, რითაც სამინისტროს მნიშვნელოვანი მატერიალური ზიანი მიადგა.
საქმეზე გამოძიება მიმდინარეობს, ბრალდებულები დაკავებული არ არიან.