ენერგეტიკის მინისტრი კახა კალაძე პრემიერ ირაკლი ღარიბაშვილის განცხადებას ეთანხმება, რომელშიც პრემიერმა იოსებ გიორხელიძის გატაცების ფაქტი ნაციონალურ მოძრაობას დაუკავშირა. კალაძის თქმით, ნაციონალური მოძრაობა ერთადერთი პოლიტიკური დაჯგუფებაა, რომელსაც ქვეყანაში ქაოსი და არეულობა "აწყობს".
"ნაციონალური მოძრაობა არის დესტრუქციული ძალა - სიცრუესა და დემაგოგიაზე დაფუძნებული პოლიტიკური დაჯგუფება. დღეს, მე ვფიქრობ, საქართველოში ერთადერთი დაჯგუფებაა ნაციონალური მოძრაობა, რომელსაც აწყობს ქვეყანაში იყოს ქაოსი, არეულობა, მაგრამ ეს არც მათ და არც მათ მომხრეებს არ გამოუვა. ვინც დააპირებს რაღაც არეულობების მოწყობას, ყველა სათანადოდ, მაქსიმალური სიმკაცრით იქნება დასჯილი, რა თქმა უნდა, კანონის ფარგლებში", - აღნიშნა კალაძემ.
"უმკაცრესად დაისჯება ყველა, ვინც ჩვენი სახელმწიფოს და მოქალაქეების წინააღმდეგ რამეს დაგეგმავს", - საქართველოს პრემიერმინისტრმა ირაკლი ღარიბაშვილმა ადამიანის მძევლად ხელში ჩაგდების ბრალდებით სოდ-ის და კუდ-ის ყოფილი თანამშრომლების დაკავება შეაფასა. როგორც პრემიერმა აღნიშნა, ეს ადამიანები სოდ-იდან და კუდ-იდან ორი წლის წინ, შინაგან საქმეთა მინისტრობისას გაათავისუფლა.
"ოპერაციას პირადად შინაგან საქმეთა მინისტრი ხელმძღვანელობდა. დღეს დილით, 07:00 საათზე მინისტრმა დამირეკა და მითხრა, რომ დაკავებულები იყვნენ გამტაცებლები. მინდა, კიდევ ერთხელ შევახსენო მოსახლეობას, ვის ხელში იყო საქართველო. ასეთი კრიმინალების, გამტაცებლების, მკვლელების და ყაჩაღების ხელში იყო მთელი შინაგან საქმეთა სამინისტრო და ესენი მართავდნენ საქართველოს. გასარკვევია, ვინ დგას ამის უკან და სამინისტრო და მინისტრი ამის გარკვევაზე მუშაობენ. ეს შემთხვევითი არ არის. მე მაქვს გონივრული ეჭვი, რომ ამის უკან დგას ორგანიზებული ძალა. დამრჩა შთაბეჭდილება, რომ ეს არის ნაციონალური მოძრაობის ხელწერა, თუმცა ამას, რა თქმა უნდა გამოძიება სჭირდება. ეს არის ის, რაზეც ალექსანდრე ჭიკაიძე საუბრობდა სულ რაღაც ერთი თვის წინ, რომ ეს არის ორგანიზებული ჯგუფი“, - განაცხადა პრემიერმინისტრმა და აღნიშნა, რომ ფოთსა და თბილისში, ლოტკინის დასახლებაში, იმართება ორგანიზებული აქციები, რომლის მონაწილეთა პრობლემების მოსაგვარებლად ნაციონალური მოძრაობის ხელისუფლებას 9 წელი ჰქონდა. ამასთან, ირაკლი ღარიბაშვილმა შინაგან საქმეთა სამინისტროს მადლობა გადაუხადა "მაღალპროფესიონალურ დონეზე შესრულებული ოპერაციისთვის, რომლის შედეგად, მძევლად აყვანილი იოსებ გიორხელიძე ოჯახს ყოველგვარი ზიანის გარეშე დაუბრუნდა".
საქართველოს პრემიერის განცხადებით, "მინდა, კიდევ ერთხელ გავაფრთხილო ის ადამიანები, ვინც დგას მათ უკან და ვის ბინძურ თავშიც იხარშება ეს სისასტიკე, რომელიც იგეგმებოდა წლების განმავლობაში, ესენი არიან ადამიანები, რომლებმაც ჩაიდინეს ხურჩის ტერაქტი, ისინი, ვინც აუპატიურებდნენ და აწამებდნენ ადამიანებს პოლიციაში, ციხეებში, იტაცებდნენ და კლავდნენ ადამიანებს. მინდა, მათ საბოლოო გაფრთხილება მივცე - გონს მოეგონ, თუ ისინი სახელმწიფოს და ჩვენი მოქალაქეების წინააღმდეგ რამეს დაგეგმავენ, უმკაცრესად დაისჯებიან. ძალიან მკაცრად დაისჯება ყველა, ვინც მსგავს პროვოკაციას და სიბინძურეს გააკეთებს".
