შშმ პირთა სასწავლო დაწესებულების ერთი შესასვლელი მეზობლებმა დაადუღეს

თბილისში, ბორჯომის ქუჩაზე არსებული შეზღუდული შესაძლებლობების მქონე პირთა სასწავლო დაწესებულება პარკინგის ადგილის გამოყოფას ითხოვს. სასწავლო დაწესებულების ხელმძღვანელისა და პედაგოგების განმარტებით, ბორჯომის ქუჩის მხრიდან მისადგომი მუდამ გადატვირთულია. გამოყოფილი პარკინგის არარსებობის გამო მშობლებს შშმ ბავშვების სკოლამდე მიყვანა უჭირთ. დაწესებულებას მეორე კარიც აქვს აღმაშენებლის ქუჩის მხრიდან, რომელიც მოსახლეობამ გარედან დაადუღა. პედაგოგებისა და მშობლების თქმით, მოსახლეობის მთავარი არგუმენტი ისაა, რომ ადგილობრივ მცხოვრებლებს შშმ ბავშვების ყოველდღიურად ყურება არ სურთ.

დაახლოებით ორი წლის წინ, ბორჯომის ქუჩის რეაბილიტაციის დროს, საჭირო გახდა მეორე კარის გახსნა, რასაც მოსახლეობამ კვლავ პროტესტით უპასუხა. პოლიციის ჩარევის შედეგად სკოლის შესასვლელი კარი რამდენიმე კვირით გახსნეს. ქუჩის რეაბილიტაციის შემდეგ კი კარი კვლავ მოსახლეობამ ჩაკეტა. სასწავლო დაწესებულება კერძო საკუთრებაა. სკოლის წარმომადგენლები ამბობენ, რომ გარდა იმისა, რომ აღნიშნული ფაქტი კერძო საკუთრების ხელყოფაა, ასევე პირდაპირი დისკრიმინაციაა შშმ პირების მიმართ, რადგან მოსახლეობა მათ თავისუფლად გადაადგილებისა და განათლების მიღების უფლებებს უზღუდავს.