LG-მ მსოფლიოს პირველი 18-ინჩიანი (45.72სმ) დასახვევი ეკრანი გააცნო. სამხრეთკორეულმა ელექტროტექნიკის მწარმოებელმა კომპანიამ მომხმარებელს მოქნილი, გამჭვირვალე ეკრანი წარუდგინა, რომლის დახვევა გაზეთის მსგავსად შეიძლება და დახვევის შემდეგი მისი დიამეტრი სულ რაღაც 3 სანტიმეტრია.
გარდა მოქნილობისა, ეკრანის გატეხვა ფაქტობრივად შეუძლებელია.
18-ინჩიან (45.72სმ) ეკრანზე დაახლოებით მილიონი მეგაპიქსელია განლაგებული და მისი რეზოლუცია 1200x800-ს (HD) აღწევს.
ამ ეტაპზე კომპანია ეკრანის ბაზარზე გატანას არ გეგმავს. მათივე განცხადებით, ეს იმ წარმატების დემონსტრაციაა, რომელსაც LG-მ ამ ტექნოლოგიის განვითარების გზაზე მიაღწია.
2017 წლისთვის კომპანიას დაგეგმილი აქვს Ultra HD მოქნილი ეკრანის შექმნა, რომლის ზომაც 60 ინჩს მიაღწევს და რომელიც იმავე პერიოდიდან აქტიურად იქნება გამოყენებული LG-ის ტექნიკაში, განსაკუთრებით კი ტელევიზორებში.
ბაზარზე პირველი მოქნილი ეკრანი, სახელწოდებით "YOUM", ჯერ კიდევ 2013 წლის იანვარში Samsung-მა წარმოადგინა, ხოლო ტელეფონებში მის გამოყენებას მომხმარებელს 2015 წლისთვის დაჰპირდა.
აღსანიშნავია ის ფაქტი, რომ დღესდღეობით არსებული მოქნილი ეკრანები უკვე გამოიყენება სხვადასხვა ტექნიკაში. მაგალითისთვის, LG-ის მობილურ ტელეფონ G-Flex-ში. თუმცა მათი დახვევა აქამდე შეუძლებელი იყო.
LG-ის გარდა ამ ტექნოლოგიის განვითარებაზე აქტიურად მუშაობენ ისეთი კომპანიები, როგორებიცაა: Samsung, Nokia და Apple, თუმცა LG-ის მსგავსი წარმატებისთვის ჯერ არცერთს მიუღწევია.
