საქართველოს მთავრობა თბილისის ანძის გამორთვასთან დაკავშირებით საგანგებო განცხადებას ავრცელებს, რომელსაც ტაბულა უცვლელად გთავაზობთ.
"თბილისის მერიის გადაწყვეტილება სატელევიზიო ანძის განათების გამორთვასთან დაკავშირებით შეიცავს შანტაჟისა და პირდაპირი საბოტაჟის ნიშნებს. გვსურს ყველას შევახსენოთ, რომ მსგავსი ქმედება ისჯება საქართველოს კანონმდებლობით.
ანძის განათება პირდაპირ უკავშირდება საავიაციო უსაფრთხოებას. ამიტომ, მერიის მიერ მიღებული გადაწყვეტილება შეიცავს სერიოზულ საფრთხეს საჰაერო ნავიგაციისთვის.
აქვე შევახსენებთ საზოგადოებას, რომ საქართველოს მთავრობას, კერძოდ, ფინანსთა სამინისტროს, არც ერთხელ არ შეუფერხებია თბილისის მერიისთვის კანონით გათვალისწინებული ტრანსფერის გადარიცხვა. შესაბამისად, ბიუჯეტის ჩავარდნით სპეკულაცია, თითქოს საფრთხე ექმნება დედაქალაქის ნორმალურ ფუნქციონირებას, არ შეესაბამება სიმართლეს.
კიდევ ერთხელ შევახსენებთ თბილისის მერიას, რომ მათი გადაწყვეტილება, გარდა იმისა, რომ შეიცავს საბოტაჟების ნიშნებს, საფრთხეს უქმნის მოქალაქეების უსაფრთხოებას.
მოვუწოდებთ თბილისის მერიას, დაუყოვნებლივ აღადგინოს ელექტროენერგიის მიწოდება თბილისის სატელევიზიო ანძისთვის, წინააღმდეგ შემთხვევაში ვიმოქმედებთ კანონის შესაბამისად", - ნათქვამია მთავრობის საგანგებო განცხადებაში.
თბილისის მერის მოვალეობის შემსრულებელმა სევდია უგრეხელიძემ დღეს განაცხადა, თბილისის ბიუჯეტის დამტკიცებამდე, ტელეანძა გამოირთვება. როგორც უგრეხელიძემ ცოტა ხნის წინ გამართულ ბრიფინგზე თქვა, თუ თბილისის საკრებულო მიიღებს ბიუჯეტს, რომელშიც იქნება გათვალისწინებული შესაბამისი თანხები, ტელეანძა კვლავ განათდება.
თბილისის ბიუჯეტი, რომელიც მერიამ საკრებულოს უკვე მეორედ წარუდგინა. პირველ ჯერზე საკრებულომ ბიუჯეტს მხარი არ დაუჭირა.
