ევროკავშირთან ასოცირების შეთანხმებაზე მოლაპარაკებების შეწყვეტის თაობაზე უკრაინის მთავრობის გადაწყვეტილება, ხელიდან გაშვებული შესაძლებლობაა, - ამის შესახებ დიდი ბრიტანეთის საგარეო საქმეთა მინისტრმა, უილიამ ჰეიგმა განცხადება გაავრცელა.
"ეს უკრაინისთვის ხელიდან გაშვებული შესაძლებლობაა. დიდი ბრიტანეთი უკრაინის ევროპულ მომავალს უჭერს მხარს და მასთან ახლო ურთიერთობას შეინარჩუნებს. ასოცირების შეთანხმება უკრაინის შანსია, ქვეყნის მოდერნიზაცია და ეკონომიკის წინსვლა უზრუნველყოს. ევროკავშირის კარი უკრაინისთვის ღია რჩება და შეთანხმებაზე ხელის მოწერა მხოლოდ მისი მთავრობის ხელშია", - ნათქვამია განცხადებაში.
განცხადებაში ასევე აღნიშნულია, რომ აღმოსავლეთ პარტნიორობის ქვეყნებისა და ევროკავშირის ურთიერთობა დიდი ბრიტანეთისთვის ძალიან მნიშვნელოვანია. დიდი ბრიტანეთის საგარეო საქმეთა მინისტრი მიესალმება საქართველოსა და მოლდოვის მიერ ვილნიუსის მომავალ სამიტზე ევროკავშირთან ასოცირებისა და თავისუფალი ვაჭრობის შესახებ შეთანხმების პარაფირებას.
