საქართველოს კალათბურთის ფედერაცია ბესიკ ლიპარტელიანისა და სპორტისა და ახალგაზრდობის მინისტრის, ლევან ყიფიანის მიმოწერის გასაჯაროების შემდეგ, კიდევ ერთ დოკუმენტს აქვეყნებს.
შეგახსენებთ, რომ გუშინ ფედერაციის ვებგვერდზე გამოაქვეყნეს მინისტრის მიერ ფედერაციაში გაგზავნილი წერილი. ფედერაციაში აცხადებენ, რომ ეს ფაქტი ყიფიანის მიერ მათ საქმიანობაში ჩარევას ადასტურებს.
დღეს, კალათბურთის ფედერაციის ვებგვერდზე ლევან ყიფიანის მიერ მიწერილი კიდევ ერთი წერილი დადეს, რომელიც 30 ივლისით თარიღდება. კალათბურთის ფედერაციის განცხადებას უცვლელად გთავაზობთ:
"საქართველოს კალათბურთის ეროვნული ფედერაციის 6 ნოემბრის განცხადებაში მინიშნებაც კი არ არის საქართველოს სპორტისა და ახალგაზრდობის საქმეთა სამინისტროს მიერ ფედერაციის საქმიანობაში ჩარევაზე. ლაპარაკია მხოლოდ მინისტრ ყიფიანის მიერ ფედერაციის საქმეებში ჩარევაზე, რომელიც გამოიხატება ფედერაციის პრეზიდენტობის ერთ-ერთი კანდიდატის აშკარა მხარდაჭერაში.
სამინისტროს უკლებლივ ყველა თანამშრომელთან (გარდა მინისტრისა) ფედერაციას ჰქონდა და აქვს საუკეთესო, საქმიანი ურთიერთობები. ვსარგებლობთ შემთხვევით და ამ ნაყოფიერი თანამშრომლობისთვის მადლობას ვუხდით ზემოთაღნიშნულ პირებს.
იმის საილუსტრაციოდ, რომ ეს არ არის მინისტრის პირველი ჩარევის მცდელობა ფედერაციის საქმიანობაში, ვაქვეყნებთ 2013 წლის 30 ივლისით დათარიღებულ მის წერილს.
შეგახსენებთ, რომ საკალათბურთო სამყაროში აშკარად ინსპირირებული ე. წ. დაპირისპირება შეიქმნა ფედერაციის 2013 წლის 10 აგვისტოს არშემდგარი რიგგარეშე ყრილობის შემდეგ. თუკი მინისტრის აზრით, მისი ბოლო, 23 ოქტომბრის წერილი საკალათბურთო სამყაროში ე.წ. დაძაბულობის განმუხტვას ემსახურება, მაშინ ისმის კითხვა: რას ემსახურებოდა მინისტრის 30 ივლისით დათარიღებული ქვემოთ მოყვანილი "ვრცელი" წერილი, რომელიც ე. წ. დაძაბულობის შექმნამდე 10 დღით ადრეა ფედერაციისადმი გამოგზავნილი".
