საერთაშორისო გამჭვირვალობა - საქართველო ქუთაისის საკრებულოს მოუწოდებს, ქალაქის მერის თანამდებობის დასაკავებლად შექმნილი საკონკურსო-საატესტაციო კომისიის საქმიანობა გამჭვირვალე გახადოს. ორგანიზაციის განცხადებით, ქუთაისის ბოლო მერმა დიმიტრი კოპალიანმა, რომელიც პოსტზე 98 დღე იმყოფებოდა, 37 დღე შვებულებაში გაატარა. მათივე ცნობით, კოპალიანს ანაზღაურების სახით მიღებული აქვს 7963.17 ლარი, მათ შორის, პრემია - 2750 ლარის ოდენობით.
"მისი მმართველობის დროს დაიწყო თვითმმართველი ქალაქის - ქუთაისის მერიის რეორგანიზაცია და შტატების შემცირება. აღნიშნულ პერიოდში სამსახურიდან დაითხოვეს 86 თანამშრომელი. კოპალიანმა ორი მოადგილე დისციპლინური პასუხისმგებლობის საფუძვლით გაათავისუფლა თანამდებობიდან. თუმცა, რეორგანიზაციიდან ძალიან მოკლე პერიოდში მერიამ სხვადასხვა სამსახურში 96 ადამიანი დაასაქმა. რაც შეეხება რეორგანიზაციის კანონიერებას, ქუთაისის საქალაქო სასამართლომ რეორგანიზაციის საფუძვლით გათავისუფლებულთა სარჩელები, სადაც ისინი თანამდებობაზე აღდგენას ითხოვდნენ, სრულად დააკმაყოფილა, რაც იმას ნიშნავს, რომ ქუთაისის მერიის საშტატო ერთეული კიდევ რამდენიმე ათეულით გაიზრდება. აღსანიშნავია ისიც, რომ ქუთაისის მერი უნდობლობას უცხადებდა მერიაში მომუშავე სხვადასხვა თანამდებობის პირებს და მათი საქმიანობის შესწავლას მოითხოვდა. მას ასევე სურდა მრჩეველთა საბჭოს შექმნა, რომელიც უშუალოდ მერისათვის მოამზადებდა ექსპერტულ დასკვნებს სხვადასხვა საკითხზე", - ნათქვამია განცხადებაში და აღნიშნულია, რომ 2013 წლის 13 სექტემბერს დიმიტრი კოპალიანის თანამდებობიდან გათავისუფლების შემდეგ, მერის მოვალეობის შემსრულებელი 2-ჯერ შეიცვალა. პირველად, მერის თანამდებობა ერთ-ერთმა ვიცემერმა, კოტე ლომიძემ დაიკავა, რომელიც 30 სექტემბერს მეორე ვიცემერმა, თენგიზ თოფურიძემ ჩაანაცვლა. კოტე ლომიძის თქმით, მერის შესარჩევ კონკურსში მონაწილეობა სურს და სწორედ ამიტომ დატოვა მერის მოვალეობის შემსრულებლის პოსტი.
"თუმცა, კონკურსი ამ დრომდე არ გამოცხადებულა და არც კანონმდებლობა უკრძალავდა კოტე ლომიძეს ყოფილიყო მერის მოვალეობის შემსრულებელი კონკურსის გამოცხადებამდე. მიგვაჩნია, რომ ქალაქის მერის ხშირი ცვლილება, ასევე შესაბამისი გამოცდილების არმქონე პირის მერის პოსტზე დანიშვნა აფერხებს ქალაქის განვითარებას და მერიის სამსახურების საქმიანობას, ასევე უარყოფითად აისახება მიმდინარე პროექტების განხორციელებაზე. მოვუწოდებთ ქუთაისის საკრებულოს გამჭვირვალე გახადოს საკონკურსო-საატესტაციო კომისიის საქმიანობა, დააკომპლექტოს იგი შესაბამისი ცოდნისა და გამოცდილების მქონე წევრებით, რათა სწორად იქნეს შერჩეული სათანადო კვალიფიკაციის მქონე პირები ქალაქის მერის თანამდებობის დასაკავებლად", - ნათქვამია განცხადებაში.
2003 წლიდან დღემდე, ქუთაისმა 11 მერი გამოიცვალა. ქუთაისი ახალი, მე-12 მერის მოლოდინშია.
