საქართველოს უახლოეს მომავალში თანამედროვე ტექნოლოგიებით აღჭურვილ კომბინირებული ციკლის თბოელექტროსადგურს მიიღებს. ეს განცხადება თურქული კომპანიის ჩალიკ ენერჯის დირექტორმა tv3-ის ეთერში განაცხადა. თბოელექტროსადგური გარდაბანში აშენდება.
ენერგეტიკული პროექტი საპარტნიორო ფონდს ეკუთვნის. ფონდის პრეზიდენტმა თურქულ კომპანიასთან ხელშეკრულება გააფორმა. პროექტის ღირებულება 200 მილიონი დოლარი იქნება. თანხას მთლიანად საპარტნიორო ფონდი და მისი შვილობილი კომპანია - გაზისა და ნავთობის კორპორაცია გაიღებს.
"მსგავსი კალიბრის თბოელექტროსადგური დამოუკიდებელი საქართველოს პირობებში პრაქტიკულად პირველად შენდება. ეს არის 230 მეგავატი სიმძლავრის თბოელექტროსადგური," - აღნიშნა საპარტნიორო ფონდის დირექტორმა ირაკლი კოვზანაძემ.
როგორც ჩალიკ ენერჯის დირექტორი აღნიშნავს, პროექტის განსახორციელებლად, კონსულტაციები საქართველოს ენერგეტიკის სამინისტროსა და საპარტნიორო ფონდთან, წლების განმავლობაში მიმდინარეობდა.
თბოელექტროსადგურის ექსპლუატაციაში შესვლა 2015 წლის ზამთარში იგეგმება.
